Տիգրան Մուկուչյանը ռեյտինգային ընտրակարգը վերացնելը քաղաքական ուժերի քննարկելու հարցն է համարում
ԵՐԵՎԱՆ, 24 ՄԱՅԻՍԻ, ԱՐՄԵՆՊՐԵՍ: Կենտրոնական ընտրական հանձնաժողովի նախագահ Տիգրան Մուկուչյանը չի ցանկանում մեկնաբանել Ընտրական օրենսգրքից ռեյտինգային ընտրակարգը հանելու մասին քննարկումները` նշելով, որ դա քաղաքական հարց է: Լրագրողների հետ զրույցում անդրադառնալով ռեյտինգային ընտրակարգը վերացնելու մասին քննարկումներին` Տիգրան Մուկուչյանն ընդգծեց, որ այդ հարցը պետք է քննարկեն և որոշում ընդունեն քաղաքական ուժերը:
«Այստեղ որոշողը քաղաքական ուժերն են: Իրենք պետք է որոշեն, թե ինչպիսի ընտրակարգ են պատկերացնում կամ ինչ ընտրակարգ պետք է գործի Հայաստանի Հանրապետությունում»,- «Արմենպրես»-ի հաղորդմամբ` նշեց Մուկուչյանը:
Նա հրաժարվեց իր կարծիքը հայտնել ռեյտինգային ընտրակարգի վերաբերյալ` ընդգծելով, որ ինքը հանդես է գալիս որպես Կենտրոնական ընտրական հանձնաժողովի նախագահ և նախընտրում է իր կարծիքը չբարձրաձայնել:
Բաժանորդագրվեք մեր ալիքին Telegram-ում