ԵՐԵՎԱՆ, 10 ՄԱՅԻՍԻ, ԱՐՄԵՆՊՐԵՍ: ԱՄՆ նախագահ Թրամփի՝ Իրանի միջուկային պայմանագրից ամերիկյան կողմի դուրս գալու հայտարարությունից հետո Իրանի և Իսրայելի հարաբերությունները լարվել են: Արևելագետ Գոհար Իսկանդարյանը չբացառեց, որ Իսրայելը հարվածներ կհասցնի Իրանի բոլոր այն օբյեկտներին, որոնք կհամարի ռազմավարական:

«Արմենպրես»-ի հաղորդմամբ՝ ՀՀ ԳԱԱ արևելագիտության ինստիտուտի ավագ գիտաշխատող, իրանագետ, Գոհար Իսկանդարյանը նման կարծիք հայտնեց մայիսի 10-ին լրագրողների հետ հանդիպմանը:  

«Ոչ միայն ԱՄՆ-ն է Իրանի նկատմամբ պատժամիջոցներ կիրառում, այլ նաև տարածաշրջանն է  հայտնվում շատ լարված վիճակում: Իսրայելական կողմը Սիրիայի տարածքում հարվածել է իրանական  բազաներին: Իրանական կողմը հայտարարել է, որ իրենք 15 զոհ ունեն: Այս գիշեր Իրանն էլ Գոլանի բարձունքում հարվածել է իսրայելական կողմին: Թեև վերջինս հայտարարում է, որ իրենց հակահրթիռային կայանները կարողացել են որսալ, և վնասներն այնքան էլ մեծ չեն եղել: Թեժանալու է: Իսրայելը հասկանում է, որ իր համար ստեղծվել է լավ շրջան, քանի որ այն, ինչ փափագում էր այս տարիների ընթացքում, ԱՄՆ նախագահ Թրամփը նրան թույլ է տալիս»,-ասաց Իսկանդարյանն ու հավելեց, որ Իսրայելն ամեն կերպ կփորձի իրականացնել իր պլանները՝ Իրանին կապանքների մեջ առնելու համար:

Նրա կարծիքով՝ շատ հնարավոր է, որ Իսրայելը փորձի հարվածներ հասցնել իրանական այն օբյեկտներին, որոնք համարի ռազմավարական: «Բայց, կարծում եմ, դա բավական ծանր կլինի Իսրայելի համար: Այդ երկիրն ունի հրթիռներ որսալու կայաններ, բայց մեծաքանակ հրթիռների դեպքում դրանք դժվար թե կարողանան ճշգրտորեն իրականացնել»,-ասաց Իսկանդարյանը:

Իսրայելի վարչապետ Բենյամին Նաթանյահուի այցը Մոսկվա նա ևս պայմանավորեց հենց այդ հանգամանքով: Սակայն, արևելագետի կարծիքով, Ռուսաստանը գոնե ինֆորմացիոն դաշտում կաջակցի Իրանին՝ ինֆորմացիա կտա, թե ինչ է պատրաստվում իրականացվել արբանյակների միջոցով:

ԱՄՆ նախագահ Դոնալդ Թրամփը մայիսի 8-ին հայտարարել էր Իրանի հետ միջուկային ծրագրի շուրջ համաձայնագրից դուրս գալու և ավելի վաղ Իրանի նկատմամբ սառեցված պատժամիջոցները վերականգնելու մասին:

2015-ի հուլիսի 14-ին Վիեննայում կնքվեց Համալիր գործողությունների համատեղ ծրագիրը, որը առավել հայտնի է որպես Իրանի միջուկային ծրագիր անվամբ: ԱՄՆ-ը, Ֆրանսիան, Մեծ Բրիտանիան, Չինաստանը, Ռուսաստանը և Գերմանիան կարողացան Իրանի հետ ստորագրել պայմանագիր, որը քննարկվում էր 10 տարի: