ԵՐԵՎԱՆ, 5 ՄԱՅԻՍԻ, ԱՐՄԵՆՊՐԵՍ: «Եվրատեսիլ 2018»-ում, որն այս տարի կանցկացվի Պորտուգալիայի մայրաքաղաք Լիսաբոնում, Հայաստանի ներկայացուցիչ Սևակ Խանաղյանը «Եվրատեսիլ»-ի պաշտոնական կայքին տված հարցազրույցում նշել է, որ մեծ սպասելիքներ ունի մրցույթից և մտածում է լավ ելույթի մասին:

«Արմենպրես»-ի հաղորդմամբ` երգիչը խոստովանել է, որ չի կարող ապրել առանց որդու և երգի: Այն հարցին, թե ի՞նչն է միշտ մոտը պահում, Սևակը պատասխանել է` իր ապարանջանը:

Սևակ Խանաղյանի խոսքով` նախքան բեմ բարձրանալը փորձում է շատ հանգիստ լինել և ոչ մի բանի մասին չմտածել:

«Իմ ողջ կյանքում չեմ էլ մտածել այլ մասնագիտություն ձեռք բերելու մասին, քանի որ երաժշտությունն իմ կյանքի իմաստն է»,-շեշտել է նա:

Երգիչը նշել է, որ «Քամի» ստեղծագործության մեջ հատկապես սիրում է «Դու տուր ինձ թևեր, որ սավառնեմ դեպի վեր» նախադասությունը:

Անդրադառնալով իր սպասելիքներին` նա փաստել է, որ մտածում է եվրատեսիլյան բեմում լավ ելույթի մասին:

Հայաստանի ներկայացուցիչը հանդես կգա մրցույթի առաջին կիսաեզրափակիչում, որը կանցկացվի մայիսի 8-ին: Սևակը հանդես կգա 16-րդ համարի ներքո՝ կատարելով «Քամի» երգը: Այս մրցույթին Հայաստանն առաջին անգամ է ներկայանալու ամբողջությամբ հայալեզու երգով:

Մրցույթի երկրորդ կիսաեզրափակիչը կանցկացվի մայիսի 10-ին, իսկ եզրափակիչը՝ 12-ին: