Ժամանակը Երևանում՝ 11:07:36,   27 Մայիս 2022

Նիկոլ Փաշինյանը պատրաստ է հանդիպել ՀՀԿ խմբակցության հետ և կոչ է անում այլ քաղաքական ուժերին վարչապետի սեփական թեկնածու չառաջադրել

Նիկոլ Փաշինյանը պատրաստ է հանդիպել ՀՀԿ խմբակցության հետ և կոչ է անում այլ քաղաքական ուժերին վարչապետի սեփական թեկնածու չառաջադրել

ԵՐԵՎԱՆ, 28 ԱՊՐԻԼԻ, ԱՐՄԵՆՊՐԵՍ: Եթե մայիսի 1-ին ազգային ժողովում կայանալիք քվեարկության ժամանակ վարչապետ ընտրվի ցանկացած այլ թեկնածու, ապա բողոքի ակցիաները ողջ հանրապետությունում շարունակվելու են տասնապատիկ ծավալով: Ինչպես հաղորդում է «Արմենպրես»-ը, նման հայտարարությամբ Վանաձորի Հայքի հրապարակում կայացած հանրահավաքի ընթացքում հանդես եկավ Ազգային ժողովի պատգամավոր Նիկոլ Փաշինյանը:

« ՀՀԿ-ն հայտարարել է, որ վարչապետի սեփական թեկնածու չի առաջադրելու: Սակայն ճիշտ կլինի, որ Հանրապետական խմբակցությունն այլ խմբակցությունների հետ համատեղ վարչապետի թեկնածու առաջադրի ժողովրդի թեկնածուին: Պատրաստակամ եմ հանդիպել ՀՀԿ բոլոր պատգամավորների հետ: Եթե նրանք անեն իրենց քայլը, ապա կդառնան այդ պատմական նվաճման համահեղինակները»,- ասաց Փաշինյանը՝ կոչ է անում այլ քաղաքական ուժերին վարչապետի սեփական թեկնածու չառաջադրել:

 Նրա խոսքով՝ շատերը փորձում են ներկայացնել, թե իրադարձությունները պտտվում են անձերի շուրջ, թե ով պետք է զբաղեցնի ՀՀ վարչապետի պաշտոնը: Իրականում, ըստ Փաշինյանի, խոսքն այլ բանի մասին է՝ թե արդյո՞ք այս քաղաքական ճգնաժամը լուծվելու է, թե՞ շարունակվելու է նաև հետագայում:

Խոսելով ապրիլի 29-ի միջոցառումների մասին՝ Փաշինյանը նշեց, որ ժամը 12:00-ից ՀՀ ողջ տարածքով և մայրաքաղաքում վերսկսվում են քաղաքացիական անհնազանդության զանգվածային գործողությունները: Բոլոր ուսումնական հաստատությունները հայտարարում են դասադուլ, բոլոր ճանապարհները փակվում են: Երեկոյան 19:00-ին Հանրապետության հրապարակում տեղի կունենա հանրահավաք, հետևաբար՝ 16:00-ին բոլոր ճանապարհները բացվում են, որպեսզի ժողովուրդը անարգել կարողանան հասնել հանրահավաքին:

Ազգային ժողովի ՀՀԿ խմբակցությունը վարչապետի թեկնածու չի առաջադրելու։ Այս մասին նշեց ՀՀԿ խոսնակ Էդուարդ Շարմազանովը՝ ապրիլի 28-ին ներկայացնելով ՀՀԿ անունից արված հայտարարությունը։ Նրա խոսքով՝ ՀՀԿ-ն քննարկի բոլոր թեկնածուների ծրագրերը և մինչև քվեարկությունը կներկայացնի դիրքորոշումը։«Արմենպրես»-ը կներկայացնի հայտարարությունն ամբողջությամբ։

 

 

 








youtube

Բոլոր նորությունները    


Գործակալության մասին

Հասցե՝ Հայաստան, 0002, Երեւան, Սարյան փող 22, Արմենպրես
Հեռ.՝ +374 11 539818
Էլ-փոստ՝ [email protected]