ԵՐԵՎԱՆ, 24 ԱՊՐԻԼԻ, ԱՐՄԵՆՊՐԵՍ: Սահմանադրական դատարանը շարունակում է իր գործը՝ անկախ ցանկացած փոփոխությունից: «Արմենպրես»-ի հաղորդմամբ` լրագրողների հետ զրույցում այս մասին ասաց Սահմանադրական դատարանի նախագահ Հրայր Թովմասյանը: «Երկրում քաղաքական իշխանության փոխվելու դեպքում անգամ Սահմանադրական դատարանը շարունակում է իր գործը: Սահմանադրական դատարանի համար նշանակություն չունի, թե երկիրն ինչ քաղաքական իշխանություն ունի»,-ասաց նա:

Լրագրողների այլ հարցերին՝ կապված երկրի ներքին քաղաքական իրավիճակի հետ, Հրայր Թովմասյանը հրաժարվեց պատասխանել` նշելով, որ իր կարգավիճակից ելնելով` որևէ խոսք ասել չի կարող:

Սերժ Սարգսյանը ապրիլի 23-ին հրաժարական է ներկայացրել ՀՀ վարչապետի պաշտոնից: ՀՀ վարչապետի լիազորությունների կատարման անհնարինության դեպքում վարչապետին փոխարինում է առաջին փոխվարչապետը: Մինչ այդ տասն օր երկրում հավաքներ ու ցույցեր էին՝ ՀՀ Ազգային ժողովի պատգամավոր Նիկոլ Փաշինյանի գլխավորությամբ: