ԵՐԵՎԱՆ, 22 ԱՊՐԻԼԻ, ԱՐՄԵՆՊՐԵՍ: «Նիգ-Ապարան» հայրենակցական միությունը մտահոգված է՝ ներքաղաքական իրավիճակի լարվածության մեղմացմանն ուղղված բանակցությունների ձախողման կապակցությամբ։ «Արմենպրես»-ը ներկայացնում է «Նիգ-Ապարան» հայրենակցական միության նախագահ Սամվել Ալեքսանյանի անունից տարածված հայտարարությունը.

«Յուրաքանչյուր երկխոսություն ենթադրում է միմյանց լսելու, համատեղ ելքեր փնտրելու պատրաստակամություն, ինչն այսօր չդրսևորվեց հավաքի կազմակերպիչների կողմից՝ չնայած նախապես ձեռք բերված պայմանավորվածությանը։  

Հավաքի կազմակերպիչները պատասխանատվություն են կրում երթերի, հավաքների խաղաղ բնույթի և անցկացման, օրինականության պահպանման համար։

Գտնվում ենք Հայոց Ցեղասպանության զոհերի հիշատակի հարգման նախաշեմին, ինչը ևս մեկ ազդակ է զգոնության, հարկ է դրսևորել քաղաքացիական ու քաղաքական հասունություն, զսպվածություն և րոպե առաջ քայլեր ձեռնարկել՝ երկրի կյանքի բնականոն ընթացքի վերականգնման ուղղությամբ»։