Ստեղծագործական միությունների ղեկավարները երկխոսության կոչ են անում
ԵՐԵՎԱՆ, 20 ԱՊՐԻԼԻ, ԱՐՄԵՆՊՐԵՍ։ Ստեղծագործական միությունների նախագահները երկրում տիրող իրավիճակի լուծումը երկխոսության մեջ են տեսնում։ «Արմենպրես»-ը զրուցել է Հայաստանի գրողների միության նախագահ Էդվարդ Միլիտոնյանի և Հայաստանի նկարիչների միության նախագահ Կարեն Աղամյանի հետ, ովքեր անդրադարձել են Երևանում վերջին օրերի իրադարձություններին։
ՀԳՄ նախագահը պաշտպանում է ՀՀ նախագահի հովանու ներքո իրական և գործնական երկխոսություն կազմակերպելու գաղափարը։ «21-րդ դարում աշխարհի խաղաղությունն ու պատերազմը այսքան մերձ չէին եղել, ինչ վերջին շաբաթներին է։ Մարդկությունը շունչը պահած սպասում է երրորդ համաշխարհայինի սանձազերծմանը։ Մազից կախված աշխարհ, երբ ռմբակոծումներն ու ահաբեկչություններն իրար հերթ չեն տալիս։ Եվ այդ կրակի եզրին է Հայաստանը, հիշեցնե՞մ մեր Արցախի խնդիրը, որ ամեն պահ կարող է վերածվել տարածաշրջանի և առավել լայն կռվադաշտի»,- ընդգծեց Միլիտոնյանը։
Նրա խոսքով՝ այս վիճակում յուրաքանչյուրն իր պատասխանատվության չափով սթափվելու կարիք ունի։
«Չմոռանանք, մեր անկայունությունից օգտվելով՝ թշնամիները, մոտ ու հեռու հարևան-բարեկամները, ակնհայտ և ծածուկ պարտադրելու են իրենց շահերի օրակարգը։ Կան բազմաթիվ հոգսեր՝ սոցիալական, աշխատանքային, արդարության, մշակութային և այլն»,- նշեց Էդվարդ Միլիտոնյանը և եզրափակելով խոսքն ասաց, որ մարդկանց հարցադրումները լուծելու մեկ հին և նոր ճանապարհ կա՝ երկխոսություն պետական, քաղաքական և հասարակական կառույցների միջև։
Հայաստանի նկարիչների միության նախագահ Կարեն Աղամյանը ևս երկխոսությունը օրակարգային է համարում։
«Երկրում այնպիսի իրավիճակ է, որ, իհարկե, պետք է երկխոսություն, համերաշխություն՝ հասկանալու համար, թե ինչպես կարող են խաղաղ ձևով իրավիճակը կարգավորել: Հասկանալի է, որ դժգոհությունները շատ են, հետևաբար երկխոսության կարիք կա: Երբ դրա մեկնարկը տրվի, արդեն հաջորդիվ կծնվի գաղափար՝ դրա իրագործման ուղիների վերաբերյալ»,- ասաց Աղամյանը և նկատեց, որ արմատական բարեփոխումները մեկ օրում հնարավոր չէ անել։
ՀՀ ԱԺ պատգամավոր Նիկոլ Փաշինյանն ու կողմնակիցները ապրիլի 13-ից փակել էին Երևանի Ֆրանսիայի հրապարակը: Նրանք ապրիլի 16-ի առավոտից կաթվածահար էին արել մայրաքաղաքի կենտրոնի երթևեկությունը, փակել բանուկ փողոցները: Դրանք երեկոյան արդեն բացվել էին, սակայն ապրիլի 17-ի առավոտյան կրկին փակվել էին հավաքի կազմակերպիչների և մասնակիցների կողմից: Ապրիլի 16-ին Բաղրամյան պողոտայում ոստիկանների և հավաքի մասնակիցների միջև միջադեպ է գրանցվել: Վեց ոստիկան, Նիկոլ Փաշինյանն ու հավաքի մոտ չորս տասնյակ մասնակիցներ տարվել էին հիվանդանոցներ: Այդ օրն ավելի քան 8 տասնյակ մարդ է բերման ենթարկվել ոստիկանություն վարչական իրավախախտումների դեպքերով: Ապրիլի 17-ի երեկոյան Փաշինյանը հայտարարել է, որ կբացեն Ֆրանսիայի հրապարակը և կգիշերեն տանը: Սակայն նրանք ապրիլի 18-ի առավոտյան կրկին փակեցին հրապարակն, ապա քայլերթով հասան ՀՀ վարչապետի նստավայր: Նրանք ապրիլի 18-ին ևս քայլերթեր են իրականացրել, իսկ ապրիլի 19-ին առավոտից փորձել են արգելափակել Կառավարության 3-րդ մասնաշենք աշխատակիցների մուտքը: Ապրիլի 19-ին ավելի քան 100 մարդ է բերման ենթարկվել: Իսկ ապրիլի 20-ին նրանք կրկին երթ սկսեցին՝ այս անգամ Գյուլբենկյան փողոցից: Ապրիլի 20-ին բերման ենթարկվածների թիվը հասավ 166-ի:
Բաժանորդագրվեք մեր ալիքին Telegram-ում