Արցախում B&B կարգի հյուրատների զարգացման ծրագիր է մշակվում
ԵՐԵՎԱՆ, 12 ԱՊՐԻԼԻ, ԱՐՄԵՆՊՐԵՍ: ԱՀ մշակույթի, երիտասարդության հարցերի և զբոսաշրջության նախարարության զբոսաշրջության վարչությունն կողմից մշակվել է Արցախի B&B կարգի հյուրատների զարգացման ծրագիր:
«Արմենպրես»-ի փոխանցմամբ, Զբոսաշրջության վարչության պետ Արտակ Գրիգորյանի խոսքով՝ ծրագրի առաջին փուլում ընդգրկված է Մարտակերտի ու Շահումյանի շրջանների մինչև 15 համայնք:
«Դրանք ընտրվել են , քանի որ գտնվում են հյուսիսային զբոսաշրջային երթուղու և Արցախի ամբողջ երկայնքով ձգվող «Ճանապարհ Թրեյլ» կոչվող արահետի վրա: Ծրագրին իրականացվելու է Հայաստանի Փոքր և միջին ձեռնարկատիրության զարգացման ազգային կենտրոն(ՓՄՁ ԶԱԿ) հիմնադրամի աջակցությամբ և Արցախի ներդրումային հիմնադրամի հետ համագործակցությամբ: ՓՄՁ զարգացման ազգային կենտրոնի հետ արդեն պայմանավորվածություն կա համապատասխան մասնագետների ներգրավման հարցում»,- նշել է Գրիգորյանը:
Նա նաև նշեց, որ համայնքների այն բնակիչները, ում հետաքրքիր է այս ծրագիրը, անցնելու են համապատասխան դասընթացներ՝ հետագայում համայնքներում հյուրատների ծառայությունը արդյունավետ կազմակերպելու համար:
Ինչպես հայտնի է, Արցախում հեռանկար ունեցող զբոսաշրջային ուղղություններից մեկը էկոտուրիզմն է: Արտակ Գրիգորյանը հավատացած է, որ Արցախի համայնքներում B&B կարգի հյուրատների հիմնումը նախադրյալներ կստեղծի նաև էկոտուրիզմի զարգացման համար:
Բաժանորդագրվեք մեր ալիքին Telegram-ում