Կառավարությունն ունի պետություն-մասնավոր համագործակցության ծրագրերն ընդլայնելու ռազմավարություն. մասնավոր սեկտորը ևս հետաքրքրված է
ԵՐԵՎԱՆ, 24 ՄԱՐՏԻ, ԱՐՄԵՆՊՐԵՍ: Հայաստանի կառավարությունը քայլեր է ձեռնարկում պետություն-մասնավոր համագործակցության համար օրենսդրական դաշտը բարելավելու և օրինական հենք ստեղծելու համար: «Արմենպրես»-ի հետ զրույցում Հայաստանի զարգացման հիմնադրամի գործադիր տնօրեն Արմեն Ավակ Ավակյանը նկատում է, որ Հայաստանի կառավարության և մասնավոր ընկերությունների միջև համագործակցության ակտիվացումը տեղավորվում է վարչապետ Կարեն Կարապետյանի հայտարարած պետություն-մասնավոր համագործակցության ընդլայնման գաղափարի շրջանակներում՝ շեշտելով, որ PPP ծրագրերն ընդլայնելու ռազմավարություն կա:
«Ընդհանրապես PPP ծրագրերը պետք է շատացնենք, և դրանք էլ ավելի ընդլայնելու ռազմավարություն կա: Հիմա PPP օրենսդրական դաշտի վրա ենք աշխատում, որ դա արդեն օրինական հենք ունենք: Համենայնդեպս, ինչպես մենք հասկանում ենք՝ մասնավոր սեկտորն էլ շատ հետաքրքրված է PPP ծրագրերով»,- ասաց Ավակ Ավակյանը:
Նա հավելեց, որ այս ամենն արդեն իսկ ազդանշան է, որ Հայաստանի կառավարությունն այդ ուղղությամբ ճիշտ ճանապարհի վրա է:
ՀՀ վարչապետ Կարեն Կարապետյանի ներկայությամբ կառավարությունում մարտի 23-ին ստորագրվել է Փոխըմբռնման հուշագիր՝ Հայաստանի Հանրապետության էներգետիկ ենթակառուցվածքների և բնական պաշարների նախարարության ջրային տնտեսության պետական կոմիտեի և լեհական «Simed Construction» ընկերության միջև: Հուշագրի համաձայն՝ կողմերը կզարգացնեն պետություն-մասնավոր ձևաչափով համագործակցությունը (PPP) ջրամբարաշինության ոլորտում ծրագրերի իրականացման ուղղությամբ:
Նույն օրը ՀՀ վարչապետ Կարեն Կարապետյանն ընդունել է ռուսական «ՎԻՍ» կորպորացիայի տնօրենների խորհրդի անդամ Սերգեյ Ռոմաշովի գլխավորած պատվիրակությանը: Հանդիպմանը քննարկվել են Հայաստանում ենթակառուցվածքների զարգացման ծրագրերի իրականացմանն ուղղված հարցեր: Մասնավորապես, անդրադարձ է կատարվել Հյուսիս-հարավ ավտոմայրուղու Սիսիան-Քաջարան հատվածի կառուցման, ինչպես նաև ջրամբարաշինության ոլորտի ծրագրերում ռուսական կորպորացիայի ներգրավման հնարավորություններին: Կողմերը պայմանավորվել են ստորագրել արձանագրություն՝ աշխատանքային խումբ ու կոմիտե ստեղծելու և ծրագրերի իրականացմանն ուղղված հետագա քայլերը դրանց շրջանակում քննարկելու նպատակով:
Բաժանորդագրվեք մեր ալիքին Telegram-ում