Լոս Անջելես, դիմավորիր Զլատանին. Իբրահիմովիչը կարիերան կշարունակի ԱՄՆ-ում
ԵՐԵՎԱՆ, 23 ՄԱՐՏԻ, ԱՐՄԵՆՊՐԵՍ: Անգլիական «Մանչեսթեր Յունայթեդ»-ի արդեն նախկին հարձակվող Զլատան Իբրահիմովիչը կարիերան կշարունակի ԱՄՆ-ում: Ինչպես հաղորդում է «Արմենպրես»-ը, ֆուտբոլիստը պայմանագիր է կնքել MLS-ում հանդես եկող «Լոս Անջելես Գելեքսի» ակումբի հետ:
Տեղեկատվությունը հաստատել է ամերիկյան ակումբի «Թվիթեր»-ի պաշտոնական էջը:
Ակումբը տեսանյութ է պատրաստել, որտեղ Իբրահիմովիչը քայլում է առյուծի հետևից և ասում. «Լոս Անջելես, դիմավորիր Զլատանին»:
Ավելի վաղ Իբրահիմովիչը երկկողմ համաձայնությամբ խզել էր պայմանագիրը «Մանչեսթեր Յունայթեդ» ակումբի հետ: Շվեդ հարձակվողը իր կարիերայի ընթացքում հասցրել է հանդես գալ այնպիսի ակումբներում , ինչպիսիք են հոլանդական «Այաքս»-ը, իտալական «Յուվենթուս»-ը, կատալոնական «Բարսելոնա»-ն, իտալական «Միլան»-ը, «Ինտեր»-ը, ֆրանսիական ՊՍԺ-ն, «շանգլիական «Մանչեսթեր Յունայթեդ»-ը:
Բաժանորդագրվեք մեր ալիքին Telegram-ում