ԵՐԵՎԱՆ, 23 ՄԱՐՏԻ, ԱՐՄԵՆՊՐԵՍ: Ազգային ժողովի ՀՀԿ խմբակցության պատգամավոր Սեյրան Սարոյանը դրական է համարում Հայկազ Բաղմանյանին Հավաքական անվտանգության պայմանագրի կազմակերպության միացյալ շտաբի պետի տեղակալի պաշտոնում նշանակելու որոշումը: Ազգային ժողովում լրագրողների հետ զրույցում Սեյրան Սարոյանն ընդգծեց, որ Հայկազ Բաղմանյանը լուրջ ճանապարհ անցած անձնավորություն է և արժանի էր այդ պաշտոնում նշանակվելուն: «Ես կարծում եմ, որ այդ նշանակումը նորմալ է. «Տաշած քարը գետնին չի մնա»,- «Արմենպրես»-ի փոխանցմամբ՝ ասաց Սարոյանը:

Դիտարկմանը, թե Հայկազ Բաղմանյանն ավելի վաղ ազատվել էր ՀՀ ԶՈՒ գլխավոր շտաբի պետի տեղակալի պաշտոնից աշխատանքային պարտականությունները կատարելու ընթացքում թերացումների համար, Սեյրան Սարոյանն ընդգծեց, որ անթերի մարդ չկա: «Եթե դուք կարծում եք, որ կարող եք գտնել մարդ, ով թերություն չունի, չարաչար սխալվում եք: Աշխատող մարդը միշտ էլ թերություն ունենում է, չաշխատողը թերություն չի ունենում»:

Սեյրան Սարոյանն ընդգծեց, որ Հայկազ Բաղմանյանն անցել է ամբողջ պատերազմով, միշտ առաջին գծում է եղել, դրա համար պետությունը նրան իր ծառայության համար փոխհատուցում է:

ՀՀ նախագահ Սերժ Սարգսյանի հրամանագրով գեներալ-լեյտենանտ Հայկազ Բաղմանյանը նշանակվել է ՀԱՊԿ միացյալ շտաբի պետի տեղակալ: Մինչ այդ Բաղմանյանն ազատվել էր ՀՀ ԶՈՒ գլխավոր շտաբի պետի տեղակալի պաշտոնից: ՀՀ պաշտպանության նախարար Վիգեն Սարգսյանը հայտարարել է, որ Հայկազ Բաղմանյանն աշխատանքից ազատվելու զեկուցագիր է գրել իր հորդորով՝ աշխատանքային պարտականությունները կատարելիս եղած թերությունների համար: