Քննարկվեցին հաշմանդամություն ունեցող անձանց իրավունքների պաշտպանությանն ու սոցիալական ներառմանն ուղղված խնդիրներ
ԵՐԵՎԱՆ, 22 ՄԱՐՏԻ, ԱՐՄԵՆՊՐԵՍ: ՀՀ կառավարությունը պատրաստակամ է նպաստել հաշմանդամություն ունեցող անձանց սոցիալական ներառման խնդիրների լուծմանը: «Արմենպրես»-ի հաղորդմամբ` մարտի 22-ին «Հաշմանդամություն ունեցող անձանց իրավունքների պաշտպանության և սոցիալական ներառման մասին» օրենքի նախագծի քննարկման ժամանակ ՀՀ աշխատանքի եւ սոցիալական հարցերի նախարարի տեղակալ Սմբատ Սաիյանն ասաց, որ քայլ առ քայլ պետք է գնալ նախանշված ճանապարհով և ունենալ հաշմանդամություն ունեցողների համար մատչելի միջավայր:
Նրա խոսքով` համալիր ծրագիրը մշակվելու է հնգամյա ժամանակահատվածի համար և հանդիսանալու է սոցպաշտպանության ու սոցներառման ուղղությամբ առաջիկա տարիներին կատարվելիք ծրագրերի համախումբ: «Անհրաժեշտ են քայլեր, որոնք կնպաստեն ծրագրի իրականացմանը»,-հավելեց նա:
Սաիյանը նշեց, որ նախագծի մշակման լիազորությունը վերապահված է աշխատանքի և սոցիալական հարցերի նախարարությանը: Դրված է մեխանիզմ, որի շրջանակներում օրենսդիրը ևս առաջիկա հինգ տարվա գործողությունների մեջ ազդեցություն կունենա դրա մշակման կամ ընդհանուր բովանդակության վրա:
Հայաստանում ապրում է հաշմանդամություն ունեցող ավելի քան 200.000 մարդ:
«Հաշմանդամություն ունեցող անձանց իրավունքների պաշտպանության և սոցիալական ներառման մասին» օրենքի նախագծի նպատակն է ապահովել բարենպաստ պայմաններ, որպեսզի ՀՀ-ում հաշմանդամություն ունեցող անձինք, այլ անձանց հետ համահավասար հիմունքներով իրականացնեն իրենց բոլոր իրավունքներն ու ազատությունները, որոնք երաշխավորված են ՀՀ Սահմանադրությամբ եւ միջազգային պայմանագրերով:
Բաժանորդագրվեք մեր ալիքին Telegram-ում