ՏՄՊՊՀ-ն աշխատում է նոր արդյունավետ գործիքներ ներդնելու ուղղությամբ
ԵՐԵՎԱՆ, 22 ՄԱՐՏԻ, ԱՐՄԵՆՊՐԵՍ: Տնտեսական մրցակցության պաշտպանության պետական հանձնաժողովն աշխատանքներ է տանում ստուգումների անցկացման լայն իրավասությունների ներդրման և պետական օժանդակության նկատմամբ վերահսկողություն սահմանելու լծակներ ձևավորելու ուղղությամբ: Ազգային ժողովի տնտեսական հարցերի մշտական հանձնաժողովի նիստի ընթացքում այս մասին ասաց ՀՀ տնտեսական մրցակցության պաշտպանության պետական հանձնաժողովի նախագահ Արտակ Շաբոյանը:
«Այս գործիքների ներդրման ուղղությամբ մենք աշխատանքներ ենք իրականացնում: Առաջիկայում պատրաստվում ենք ուսումնասիրել միջազգային փորձը, քանի որ այդ գործիքները միջազգային պրակտիկայում լայն կիրառում ունեն: Մենք արդեն միջազգային փորձագետներին խնդրել ենք, որպեսզի մեզ ներկայացնեն միջազգային փորձը, որպեսզի այս ուղղությամբ աշխատանքներ տանենք»,- «Արմենպրես»-ի փոխանցմամբ՝ նշեց Շաբոյանը՝ պատասխանելով «Ծառուկյան» խմբակցության պատգամավոր, ԱԺ փոխնախագահ Միքայել Մելքումյանի հարցին՝ ի՞նչ լրացուցիչ գործիքներ են անհրաժեշտ հանձնաժողովի աշխատանքն առավել արդյունավետ դարձնելու համար:
Արտակ Շաբոյանը նաև ընդգծեց, որ «Տնտեսական մրցակցության պաշտպանության մասին» նոր օրենքով նոր գործիքներ են նախատեսում, որոնք կհեշտացնեն հանձնաժողովի աշխատանքը: Մասնավորապես, Շաբոյանը շեշտեց, որ նախատեսվում են գործիքներ, որ կլինի պատժամիջոցների մեղմացում այն տնտեսվարողների համար, որոնք հանձնաժողովին տեղեկություններ կտրամադրեն հակամրցակցային համաձայնությունների մասին:
Բաժանորդագրվեք մեր ալիքին Telegram-ում