ԵՐԵՎԱՆ, 16 ՄԱՐՏԻ, ԱՐՄԵՆՊՐԵՍ: Հայաստանի ֆուտբոլի ազգային հավաքականի գլխավոր մարզիչ Արթուր Պետրոսյանը Էստոնիայի և Լիտվայի հավաքականների դեմ ընկերական հանդիպումներին մասնակցելու համար հավաքական է հրավիրել Կոլումբիայի առաջնությունում հանդես եկող «Բրիակա Չիկո» ակումբի ֆուտբոլիստ Ժոաո Ժորդի Մոնրո Արարատը:

Ինչպես հաղորդում է «Արմենպրես»-ը, վկայակոչելով transfermarkt.co.uk կայքի տվյալները, Ժոաո Ժորդի Մոնրո Արարատը հանդես է գալիս աջ պաշտպանի դիրքում, կարող է հանդես գալ նաև  կենտրոնական պաշտպանի դիրքում: Ժորդի Մոնրոն աջլիկ է: Նա ծնվել է 1996թ. հունվարի 3-ին Կոլումբիայի մայրաքաղաք Բոգոտայում:

Հայաստանի հավաքականի նորեկը 22 տարեկան է, հասակը՝ 1.85 սմ: Նա «Բրիակա Չիկո» ակումբում հանդես է գալիս 2017թ.  հուլիսից: Նրա տրանսֆերային արժեքը գնահատվում է 225 հազար եվրո:

Ակումբը,. որտեղ հանդես է գալիս Ժոաո Ժորդի Մոնրո Արարատը, այս պահին զբաղեցնում է Կոլումբիայի առաջնության մրցաշարային աղյուսակի վերջին հորիզոնականը: Ակումբը 2017թ. նվաճել է Կոլումբիայի ֆուտբոլի առաջնության բարձրագույն խմբում հանդես գալու իրավունք: «Բրիակա Չիկո»- ակումբը հիմնադրվել է 2002թ.:

Կոլումբիայի ընթացիկ առաջնությունում «Բրիակա Չիկո»-ն անցկացրել է 8 հանդիպում, որոնցից 5-ում պարտություն է կրել, երեք խաղ ավարտել ոչ ոքի արդյունքով: Ժոաո Ժորդի Մոնրո Արարատը մասնակցել է 7 հանդիպման, մեկ խաղում մնացել է պահեստայինների նստարանին: