Ժամանակը Երևանում՝ 11:07:36,   17 Դեկտեմբեր

Արմեն Սարգսյանը մասնակցել է Գլադսթոնի գրադարանի ԱՄՆ Բարեկամների ընդունելությանը


ԵՐԵՎԱՆ, 14 ՄԱՐՏԻ, ԱՐՄԵՆՊՐԵՍ: ՀՀ նորընտիր նախագահ Արմեն Սարգսյանը մարտի 13-ին Նյու-Յորքում մասնակցել է Միացյալ Թագավորության նախկին վարչապետ, անվանի պետական գործիչ Ուիլիամ Գլադսթոնի անունը կրող գրադարանի ԱՄՆ Բարեկամների կազմակերպած ընդունելությանը

Ինչպես «Արմենպրես»-ին տեղեկացրին Արմեն Սարգսյանի գրասենյակից, երեկոյի  ընթացքում հատուկ մրցանակով պարգևատրվել է  1997թ-ից վեր Կարնեգի հիմնարկության նախագահ Վարդան Գրեգորյանը, ով, մասնագիտացած լինելով պատմության և հումանիտար գիտությունների ոլորտում, տարբեր տարիների աշխատել է հեղինակավոր մի շարք կազմակերպություններում և իր գիտական ներդրումների համար արժանացել բազմաթիվ պարգևների:

19–րդ դարի երկրորդ կեսին Միացյալ Թագավորության վարչապետի պաշտոնը չորս անգամ զբաղեցրած Ուիլիամ Գլադսթոնը (1809-1898թթ) մի շարք առիթներով ելույթներ է ունեցել ի պաշտպանություն թուրքական բռնապետության տակ կեղեքվող հայերի, ինչի համար էլ վայելել է աշխարհասփյուռ հայերի հարգանքը։

Կարնեգի հիմնարկությունը խոշոր նվիրատվություն է արել Գլադսթոնի գրադարանին, որը նպաստելու է Գլադսթոնի ժառանգության հետագա ուսումնասիրությանը և ժողովրդավարության, մարդու իրավունքների, ցեղասպանությունների կանխարգելման ոլորտներում նոր նախագծերի իրականացմանը: Մասնավորապես, նվիրատվությունը ծառայելու է ցեղասպանության թեմայով ցուցահանդեսի կազմակերպմանը: Ցուցահանդեսը մեկնարկելու է Երևանում և այնուհետև շրջելու է աշխարհի տարբեր երկրներում:

2017թ. մայիսի 22-ին Միացյալ Թագավորությունում Հայաստանի Հանրապետության դեսպան Արմեն Սարգսյանն այցելել էր Ուելսի Հոուրդեն բնակավայր, որտեղ գտնվում է Գլադսթոնի գրադարանը։ Դեսպան Սարգսյանը հանդիպում էր ունեցել Գլադսթոնի ժառանգ Չարլի Գլադսթոնի և գրադարանի ղեկավարության հետ: Ծանոթանալով հայերին վերաբերող գլադսթոնյան ժառանգությանը` Արմեն Սարգսյանն ասել էր, որ առկա հարուստ նյութերն ու վկայությունները հայ-բրիտանական պատմական առնչություններն ուսումնասիրելու համար լավ հիմք են։




Լրահոս

Բոլոր նորությունները    




Գործակալության մասին

Հասցե՝ Հայաստան, 0002, Երեւան, Սարյան փող 22, Արմենպրես
Հեռ.՝ +374 11 539818
Էլ-փոստ՝ [email protected]
Яндекс.Метрика
Էջի կարգավորումներ