Ժամանակը Երևանում՝ 11:07:36,   22 Սեպտեմբեր

ՀՀ-ում ՄԱԿ-ի նորանշանակ մշտական համակարգողը հավատարմագրման նամակների պատճեններն է հանձնել ՀՀ ԱԳ նախարարին


ԵՐԵՎԱՆ, 6 ՄԱՐՏԻ, ԱՐՄԵՆՊՐԵՍ: ՀՀ ԱԳ նախարար Էդվարդ Նալբանդյանը մարտի 6-ին ընդունել է Հայաստանում ՄԱԿ-ի նորանշանակ մշտական համակարգող և ՄԱԿ-ի զարգացման ծրագրի մշտական ներկայացուցիչ Շոմբի Շարփին՝ հավատարմագրման նամակների պատճենների հանձնման կապակցությամբ:

Այս մասին «Արմենպրես»-ին տեղեկացրին ՀՀ արտաքին գործերի նախարարության մամուլի, տեղեկատվության և հասարակայնության հետ կապի վարչությունից՝ հավելելով. «Ողջունելով հյուրին՝ Էդվարդ Նալբանդյանը նշեց, որ անդամակցությունից ի վեր Հայաստանն ակտիվորեն մասնակցում է ՄԱԿ-ի և դրա կառույցների աշխատանքներում և նպատակադրված է շարունակել դրական օրակարգով ներգրավվածությունը ՄԱԿ-ի նպատակների իրականացմանը։ ԱԳՆ ղեկավարը բարձր գնահատեց Հայաստանի կառավարության և ՄԱԿ-ի հայաստանյան գրասենյակի արդյունավետ համագործակցությունը՝ ընդգծելով, որ ՄԱԿ-ի գրասենյակի նորանշանակ ղեկավարն իր նպաստը կբերի Հայաստանում ՄԱԿ-ի ծրագրերի արդյունավետ իրագործմանը։

Շնորհակալություն հայտնելով ընդունելության համար՝ Շոմբի Շարփը նշեց, որ ջանք չի խնայի տարբեր բնագավառներում Հայաստանի և ՄԱԿ-ի համատեղ նախագծերի արգասաբեր իրականացման շարունակականությունն ապահովելու ուղղությամբ:

Հանդիպմանն անդրադարձ արվեց Կայուն զարգացման նպատակներին և այդ համատեքստում երկուստեք գոհունակությամբ նշվեց, որ Հայաստանում ակտիվորեն ընթանում է դրանց իրականացման գործընթացը:

Զրուցակիցներն արծարծեցին հոկտեմբերին Երևանում կայանալիք Ֆրանկոֆոնիայի միջազգային կազմակերպության գագաթաժողովի նախապատրաստական աշխատանքներին վերաբերող հարցեր։

Էդվարդ Նալբանդյանը Շոմբի Շարփին ներկայացրեց ղարաբաղյան հիմնախնդրի խաղաղ կարգավորման ուղղությամբ Հայաստանի և ԵԱՀԿ Մինսկի խմբի համանախագահ երկրների կողմից գործադրվող ջանքերը»։




Լրահոս

Բոլոր նորությունները    




Գործակալության մասին

Հասցե՝ Հայաստան, 0002, Երեւան, Սարյան փող 22, Արմենպրես
Հեռ.՝ +374 11 539818
Էլ-փոստ՝ [email protected]
Яндекс.Метрика
Էջի կարգավորումներ