ԵՐԵՎԱՆ, 28 ՓԵՏՐՎԱՐԻ, ԱՐՄԵՆՊՐԵՍ: Հայաստանի խորհրդարանը մեկ րոպե լռությամբ հարգեց 30 տարի առաջ Ադրբեջանի Սումգայիթ քաղաքում պետական մակարդակով կազմակերպված կոտորածներին զոհ գնացած հայորդիների հիշատակը։ Ինչպես հաղորդում է «Արմենպրես»-ը, Ազգային ժողովի նիստի մեկնարկին նման առաջարկով հանդես եկավ խորհրդարանի խոսնակ Արա Բաբլոյանը:

«30 տարի առաջ այս օրերին Ադրբեջանի հայաբնակ Սումգայիթ քաղաքում պետական մակարդակով կազմակերպված հանցագործության հետևանքով դաժանաբար սպանվեցին հարյուրավոր հայ բնակիչներ: Ադրբեջանական իշխանությունների կողմից իրականացված զանգվածային ջարդերի նպատակն էր հայերին վախեցնել նոր ցեղասպանությամբ և ստիպել նրանց հրաժարվել ազգային ազատագրական շարժումից: 30 տարի առաջ Ադրբեջանի իշխանությունների կողմից ծրագրված և հայ ժողովրդի նկատմամբ իրականացված ոճրագործությունը, ցավոք, միջազգային հարթակներում չի արժանացել համարժեք քաղաքական և իրավական գնահատականի»,- ասաց Բաբլոյանը:

Նա հավելեց, որ դատապարտման բացակայությունն ավելի խրախուսեց Ադրբեջանին այնուհետ իրականացնել էթնիկ զտումներ և ջարդեր Կիրովաբադում, Բաքվում, Մարաղայում և Ադրբեջանի հայաբնակ այլ բնակավայրերում: «Հարգելի գործընկերներ, առաջարկում եմ մեկ րոպե լռությամբ հարգել ոճրագործությանն անմեղ զոհ դարձած մեր հայրենակիցների հիշատակը»,- եզրափակեց Արա Բաբլոյանը:

Պատգամավորները հոտնկայս, մեկ րոպե լռությամբ հարգեցին Սումգայիթում հայերի կոտորածներին զոհ գնացած հայորդիների հիշատակը: