Գյումրիում նշվեց Անդրանիկ Օզանյանի ծննդյան 153-ամյակը
ԳՅՈՒՄՐԻ, 25 ՓԵՏՐՎԱՐԻ, ԱՐՄԵՆՊՐԵՍ։ Գյումրիում փետրվարի 25-ին նշվեց Անդրանիկ Օզանյանի ծննդյան 153-ամյակը: Ինչպես միշտ, այս անգամ ևս բոլորը հավաքվել էին Անդրանիկ զորավարի հուշարձանի մոտ:
Ի հիշատակ մեծ հայդուկապետի, քաղաքային իշխանությունների ներկայացուցիչները՝ Գյումրու փոխքաղաքապետ Վաղարշակ Մխիթարյանի գլխավորությամբ, արվեստի ոլորտի, երաժշտական դպրոցների ու թանգարանների ներկայացուցիչների հետ ծաղկեպսակ ու ծաղիկներ դրեցին զորավարի հուշարձանին:
Շուրջ երեսուն տարի Օսմանյան կայսրության դեմ մարտնչած հայդուկապետին, ով ստանձնեց նաեւ հայկական կամավորական առաջին գնդի հրամատարությունը, հիշել եւ արժևորել է պետք միշտ. այս մասին նշում էին ներկաները:
«153 տարի է անցել, բայց այն, որ հայդուկապետին հիշում ու մեծարում են մինչ օրս, խոսում է նրա մեծ զորավար լինելու մասին: Մենք հիմա խոնարհվում ենք նրա ու մեր բոլոր զորավարների շիրիմների առաջ: Մեր բոլոր հերոս զորավարների անունները՝ Անդրանիկ զորավարի գլխավորությամբ, հավերժ են»,- «Արմենպրես»-ին նշեց Երկրապահ կամավորների միության Շիրակի մարզային կառուցի ղեկավար Յուրա Ալեքսանյանը։
Արմենուհի Մխոյան
Բաժանորդագրվեք մեր ալիքին Telegram-ում