ԵՐԵՎԱՆ, 24 ՓԵՏՐՎԱՐԻ, ԱՐՄԵՆՊՐԵՍ: Օլիմպիական խաղերի արծաթե մեդալակիր Սիմոն Մարտիրոսյանը Հայաստանի առաջնությունում իր մարզավիճակը լավագույնը չի համարում:

«Հայաստանի առաջնությանը մասնակցում էինք պարզապես տոնուսի մեջ մնալու համար, քանի որ այլ մրցաշարի չենք մասնակցելու: Սա պետք էր աշխարհի առաջնությանը լավ մասնակցելու համար: Ես էլ, Գոռն էլ մեր լավագույն մարզավիճակում չենք և դեռ վաղ է: Իհարկե, կորուստ եմ համարում այն, որ բաց ենք թողնելու Եվրոպայի առաջնությունը, սակայն առավել մեծ բացթողում էր աշխարհի առաջնությանը չմասնակցելը»-«Արմենպրես»-ի հետ զրույցում ասաց Մարտիրոսյանը:

105+ կգ քաշային կարգում պայքարը ծավալվեց 31-րդ ամառային Օլիմպիական խաղերի երկու փոխչեմպիոնների` Գոռ Մինասյանի և Սիմոն Մարտիրոսյանի միջև: Ոսկե մեդալակիր դարձավ Գոռ Մինասյանը (415 կգ), Սիմոն Մարտիրոսյանը երկրորդն է (405 կգ) և բրոնզե մեդալ նվաճեց Վարազդատ Լալայանը (370 կգ):