ԵՐԵՎԱՆ, 22 ՓԵՏՐՎԱՐԻ, ԱՐՄԵՆՊՐԵՍ: Հայաստանի արտաքին գործերի նախարարի տեղակալ Շավարշ Քոչարյանն արձանագրում է, որ 30 տարի առաջ այս օրերին գրվել է տարածաշրջանի պատմության ամենամութ էջերից մեկը, երբ Արցախի ժողովրդի՝ սեփական ճակատագիրը տնօրինելու խաղաղ պահանջներին ի պատասխան, Ադրբեջանը փորձեց լռեցնել արցախահայությանը երկրի ողջ տարածքում հայկական ջարդերի ալիքով: «Այս քաղաքականության առաջին դրսևորումը եղան Ստեփանակերտի ցույցերից հարյուրավոր կիլոմետր հեռավորության վրա գտնվող Սումգայիթ քաղաքի հայ բնակչության ջարդերը: Եվ այդ բռնությունների ալիքը, որը սկսվեց Սումգայիթում, շարունակվեց Ադրբեջանի այլ քաղաքներում՝ Կիրովաբադում, Բաքվում: Ադրբեջանի հայատյաց քաղաքականությունն այսօր դարձել է այդ երկրի ղեկավարության ներքին և արտաքին քաղաքականության անքակտելի մաս, որի վրա նրանք կառուցում են ադրբեջանցի ժողովրդի ինքնագիտակցումը և կայացումը»,- «Արմենպրես»-ի փոխանցմամբ՝ ընդգծեց Շավարշ Քոչարյանը:

Նա շեշտեց, որ 30 տարվա ընթացքում Ադրբեջանի իշխանությունների գործելաոճը չի փոխվել: «Մենք դրան ականատես եղանք 2013 թ., երբ հայ սպա Գուրգեն Մարգարյանին կացնահարելու համար դատապարտված Ռամիլ Սաֆարովը Ադրբեջան վերադառնալուն պես ազատ արձակվեց և հերոսացվեց: 2016 թ. ապրիլյան քառօրյա պատերազմի ընթացքում աշխարհը նորից ականատես եղավ հայերի նկատմամբ Ադրբեջանի հասարակության մեջ սերմանված ատելության քարանձավային դրսևորումներին՝ ուղղված թե խաղաղ բնակչության, թե ռազմագերիների դեմ: Եվս մեկ անգամ Ադրբեջանն ապացուցեց, որ քաղաքակիրթ աշխարհի կանոնները, միջազգային հումանիտար և մարդու իրավունքների նորմերն այդ երկրի իշխանությունների համար դատարկ հնչյուն են»,- ընդգծեց Քոչարյանը:

Ադրբեջանի իշխանությունները, հակադրվելով միջազգային հանրության և ԵԱՀԿ Մինսկի խմբի համանախագահ երկրների բազմաթիվ կոչերին, հասարակությունը խաղաղության պատրաստելու փոխարեն, շարունակում են իրենց ռազմատենչ և առավելապաշտական քաղաքականությունը: «Արցախի ժողովրդի՝ խաղաղ, ժողովրդավարական և ազատ երկրում ապրելու օրինական պահանջին Ադրբեջանի իշխանությունների կողմից ուժով և ուժի սպառնալիքով պատասխանելու քաղաքականությունն է պատճառը, որ Լեռնային Ղարաբաղի հակամարտությունը չի կարգավորվում»,- ասաց ՀՀ ԱԳ նախարարի տեղակալը:

Նրա խոսքով՝ միջազգային գործընկերների մոտ հասունանում է այն գիտակցությունը, որ քանի դեռ Ադրբեջանի իշխանությունները շարունակում են հայատյացության քաղաքականությունը, Հարավային Կովկասի տարածաշրջանում վտանգված են խաղաղությունը, կայունությունը և անվտանգությունը: «Հավատարիմ լինելով ղարաբաղյան շարժման գաղափարներին և նպատակներին՝ համազգային խնդիրների շուրջ մեր համախմբմամբ, երկրի ներսում և միջազգային հարթակներում հետևողական և նպատակային աշխատանքով ենք պարտադրելու Ադրբեջանին խաղաղություն՝ բացառելու նոր սումգայիթների հնարավորությունը, հասնելու Արցախի միջազգային ճանաչմանը, երաշխավորելու տարածաշրջանում հայության անվտանգությունը և բարգավաճումը»,- եզրափակեց Շավարշ Քոչարյանը: