Երևան ընդհանուր իրավասության դատարանի նորանշանակ նախագահը ներկայացվեց դատավորներին
ԵՐԵՎԱՆ, 21 ՓԵՏՐՎԱՐԻ, ԱՐՄԵՆՊՐԵՍ: ՀՀ վճռաբեկ դատարանի նախագահ Արման Մկրտումյանը փետրվարի 21-ին Երևան քաղաքի ընդհանուր իրավասության դատարանի դատավորներին է ներկայացրել դատարանի նորանշանակ նախագահ Ռուբեն Վարդազարյանին և ընդգծել նրա՝ որպես իրավաբանի, մասնագիտական ու մարդկային բարձր որակները, աշխատանքային փորձն ու հեղինակությունը, որոնք կարևոր են պատասխանատու պաշտոնը ստանձնելու և Երևան քաղաքի ընդհանուր իրավասության դատարանի նախագահի լիազորություններն ու պարտականությունները պատշաճ կատարելու համար:
Ինչպես «Արմենպրես»-ին տեղեկացրին ՀՀ դատական դեպարտամենտի Արարողակարգի և հասարակայնության հետ կապերի վարչությունից, միջոցառման ավարտին ՀՀ վճռաբեկ դատարանի նախագահ Արման Մկրտումյանի գլխավորությամբ անցկացվել է աշխատանքային խորհրդակցություն, որին մասնակցել են նաև ՀՀ վճռաբեկ դատարանի քաղաքացիական և վարչական պալատի նախագահ Երվանդ Խունդկարյանը, ՀՀ վճռաբեկ դատարանի քրեական պալատի նախագահ Սերժիկ Ավետիսյանն ու ՀՀ դատական դեպարտամենտի ղեկավար Կարեն Փոլադյանը:
ՀՀ Նախագահի 2018 թվականի փետրվարի 21-ի հրամանագրով՝ Ռուբեն Էդուարդի Վարդազարյանը նշանակվել է Երևան քաղաքի ընդհանուր իրավասության դատարանի նախագահի պաշտոնում:
Բաժանորդագրվեք մեր ալիքին Telegram-ում