Հայաստանը հաշվառման փաստաթղթային համակարգից կանցնի էլեկտրոնային ինտեգրված համակարգի
ԵՐԵՎԱՆ, 20 ՓԵՏՐՎԱՐԻ, ԱՐՄԵՆՊՐԵՍ։ Հայաստանի Հանրապետությունը 2018 թվականին հաշվառման փաստաթղթային համակարգից անցում կկատարի էլեկտրոնային ինտեգրված համակարգի։
«Արմենպրես»-ի հաղորդմամբ՝ լրագրողների հետ զրույցում այս մասին ասաց ՀՀ կառավարությանն առընթեր Պետական գույքի կառավարման վարչության պետ Արման Սահակյանը։
«Մենք այսօր ունենք այդ հաշվառման բազան, բայց երբևէ էլեկտրոնային համակարգով չենք իրականացրել։ Այսուհետ ցանկացած կառավարչական մարմին կամ գերատեսչություն էլեկտրոնային եղանակով կարող է տեսնել, թե գույքի հետ, որն իրեն անհատույց տրամադրվել է, ինչ փոփոխություններ են իրականացվում, ինչ արդյունավետությամբ է օգտագործվում կոնկրետ այդ կառույցներին ամրացված գույքը։ Քաղաքացիները նույնպես կարող են տեսնել, հասկանալ, թե ՀՀ-ն ինչ արժեքի, ինչ քանակի պետական գույք ունի տվյալ պահին»,- ընդգծեց Սահակյանը։
Հաշվառման համակարգում կներբեռնվեն գույքի բնութագրիչ ցուցանիշները, ինչպես նաև գույքի մասին պատկերային տեղեկությունները։ Հաշվառման համակարգը հասանելի կլինի բոլոր շահագրգիռ մարմիններին և կունենա ավելի մեծ կիրառական նշանակություն։
Բաժանորդագրվեք մեր ալիքին Telegram-ում