Դատարանի կողմից փաստաբանի նկատմամբ տուգանք կիրառելու հարցում չեզոքացվել են հնարավոր ռիսկերը. Հարությունյան
ԵՐԵՎԱՆ, 20 ՓԵՏՐՎԱՐԻ, ԱՐՄԵՆՊՐԵՍ: ՀՀ դատարանների կողմից փաստաբանի նկատմամբ տուգանք կիրառելու վերաբերյալ իրավակարգավորման հարցում ներդրվել են հատուկ գործիքներ՝ չեզոքացնելու բոլոր հնարավոր ռիսկերը: «Արմենպրես»-ի հաղորդմամբ` փետրվարի 20-ին լրագրողների հետ զրույցում այս մասին ասաց ՀՀ արդարադատության նախարար Դավիթ Հարությունյանը:
«Փաստաբանին հնարավորություն է ընձեռվել բողոքարկել դատարանի տուգանք կիրառելու որոշումը, որն անմիջապես կասեցնում է փաստաբանի նկատմամբ տուգանքի կիրառումը՝ մինչև վերադաս դատարանը չքննի այդ հարցը: Բացի այդ, դատավորների համար հատուկ պահանջներ են նախատեսվել, թե ինչ քայլեր պետք է ձեռնարկեն մինչև տուգանք կիրառելը, և եթե դատավորը խախտում կատարեց ու չհետևեց օրենքի պահանջներին, հենց ինքը ենթակա կլինի կարգապահական պատասխանատվության»,- ընդգծեց Հարությունյանը:
Նրա խոսքով` այս հարցում երկխոսությունը երբևէ սպառված չի լինի, և նախարարությունը պատրաստ է շարունակել համատեղ աշխատանքը:
Փետրվարի 14-ին Փաստաբանների նախաձեռնող խումբը դիմել էր ՀՀ նախագահին՝ Ազգային ժողովի կողմից ընդունված ՀՀ քաղաքացիական դատավարության օրենսգիրքը և փաթեթի մեջ ներառված օրենքները համապատասխան առարկություններով և առաջարկություններով ՀՀ Ազգային ժողով վերադարձնելու և քննարկում պահանջելու խնդրանքով:
Բաժանորդագրվեք մեր ալիքին Telegram-ում