ԵՐԵՎԱՆ, 16 ՓԵՏՐՎԱՐԻ, ԱՐՄԵՆՊՐԵՍ: Հայաստանի վարչապետի ցուցումով կառավարությունը քննարկում է սպառումը հարկելու ճանապարհով եկամուտների և կապիտալի հարկային բեռը նվազեցնելու երկարաժամկետ ծրագիր, որը նախատեսվում է իրականացնել եկամտային հարկի միասնական և ցածր դրույքաչափ սահմանելու եղանակով: Ազգային ժողովում Հարկային օրենսգրքում փոփոխությունների նախագծի քննարկման ժամանակ այս մասին հայտնեց ՀՀ ֆինանսների նախարարի տեղակալ Դավիթ Անանյանը:

«Օրինակ, առաջարկելու ենք եկամտային հարկի միասնական ցածր դրույքաչափ: Դա կլինի 20, 21, թե 22 տոկոս, այդ հարցի շուրջ մենք խորքային քննարկումներ ենք իրականացնում»,- «Արմենպրես»-ի հաղորդմամբ՝ նշեց Անանյանը:

Նա հավելեց, որ, օրինակ, եկամտային հարկի դրույքաչափը 20 տոկոս սահմանելու դեպքում կունենան 72 միլիարդ դրամի բյուջետային եկամուտների կորուստ:  «Հետևաբար, բոլորով միասին պետք է մտածենք, թե որտեղից ենք հայթայթելու այդ կորուստը»,- եզրափակեց փոխնախարարը: