ԵՐԵՎԱՆ, 3 ՓԵՏՐՎԱՐԻ, ԱՐՄԵՆՊՐԵՍ: Արվեստի և գիտության եվրոպացի մոտ 100 գործիչ նամակով դիմել է Գերմանիայի կանցլեր Անգելա Մերկելին և ԱԳ նախարար Զիգմար Գաբրիելին` կոչ անելով  արձագանքել Սիրիայի Աֆրինի շրջանում թուրքերի կողմից իրականացվող ռազմական գործողությանը :

Այս մասին, ինչպես հաղորդում է «Արմենպրես»-ը, հայտնում է թուրքական «Դիքեն» պարբերականը:

Նամակի տակ ստորագրած անձինք Գերմանիայի կառավարությանը և Եվրամիությանը կոչ են արել հնարավոր ամեն ջանք գործադրել Թուրքիայի  կողմից Սիրիայի դեմ իրականացվող հարձակումներին անմիջապես վերջ տալու ուղղությամբ:

«Ջանքեր գործադրեք եվրոպական արժեքների, համոզիչ և կուռ ժողովրդավարության, միջազգային իրավունքի և մարդու իրավունքների պաշտպանության համար»,-նշված է Գերմանիայի կանցլեր Անգելա Մերկելին և ԱԳ նախարար Զիգմար Գաբրիելին ուղղված նամակում:

Թուրքիայի զինված ուժերի գլխավոր շտաբը հունվարի 20-ին սկսել է «Ձիթենու ճյուղ» գործողությունը Սիրիայի Աֆրին նահանգի քրդական ուժերի դեմ: Այս գործողության մեջ թուրքական ուժերին միացել է նաև Սիրիական ազատ բանակը: