ԵՐԵՎԱՆ, 24 ՀՈՒՆՎԱՐԻ, ԱՐՄԵՆՊՐԵՍ: Խորհրդարանական կառավարման համակարգին անցնելը Հայաստանում տեղի ունեցող բարեփոխումների տրամաբանական շարունակությունն է: Եվրոպայի խորհրդի խորհրդարանական վեհաժողովում այս մասին նշել է ՀՀ նախագահ Սերժ Սարգսյանը` պատասխանելով պատգամավորների հարցերին:

«Մեր համոզմամբ խորհրդարանական կառավարումն ավելի ներառական կառավարում է, ավելի թափանցիկ կառավարում է, և ավելի է համապատասխանում ժողովրդավարության զարգացման տեսլականին: Պետք է ասեմ, որ մեր կարծիքով խորհրդարանական կառավարման համակարգը նպաստելու է մեր երկրում ժողովրդավարության զարգացանը, մարդու իրավունքների պաշտպանությանը»,- «Արմենպրես»-ի հաղորդմամբ ասաց Սերժ Սարգսյանը:

2015 թվականին Հայաստանում անցկացված սահմանադրական բարեփոխումների համաձայն Հայաստանն անցում է կատարում խորհրդարանական կառավարման համակարգի: Նոր Սահմանադրությունն իր բոլոր դրույթներով լիարժեք ուժի մեջ կմտնի այս տարվա ապրիլից: Հայաստանի խորհրդարանը ՀՀ նախագահ կընտրի մարտի 2-ին, իսկ ՀՀ վարչապետ` ապրիլի 17-ին: