2 աշակերտ ունեցող Մեծաձորի հիմնական դպրոցը կլուծարվի
ԵՐԵՎԱՆ, 23 ՀՈՒՆՎԱՐԻ, ԱՐՄԵՆՊՐԵՍ: Կառավարության որոշմամբ Մեծաձորի հիմնական դպրոցը կլուծարվի՝ հիմք ընդունելով դպրոցի աշակերտների թվի նվազումը: «Արմենպրես»-ի հաղորդմամբ, այդ մասին որոշման նախագիծն ընդգրկված է կառավարության հունվարի 25-ի նիստի օրակարգում:
Մեծաձորի հիմնական դպրոցում աշակերտների թիվն ընդամենը 2 է, ուսուցիչների, վարչական և սպասարկման անձնակազմը՝ 9: «Դպրոցում բնականոն հանրակարթական ուսուցում իրականացնելուն խոչընդոտ է հանդիսանում աշակերտների թվի նվազումը, որը հանգեցնում է դասարանների ոչ լիարժեք կոմպլեկտավորմանը: Նախագիծն ընդունելու դեպքում կլուծարվի դպրոցը, իսկ աշակերտների ուսուցումը հնարավոր կլինի կազմակերպել Վերին Բազմաբերդի հիմնական դպրոցում: Դպրոցների միջև եղած հեռավորությունը շուրջ 3,5 կմ է: Տարեկան տնտեսված գումարի չափը կկազմի շուրջ 13 մլն դրամ»,- նշված է նախագծի հիմնավորման մեջ:
Բաժանորդագրվեք մեր ալիքին Telegram-ում