Դիլիջան և Արևիկ ազգային պարկերում օնլայն ռեժիմով աշխատող 24 ժամյա տեսախցիկներ են տեղադրվել
ԵՐԵՎԱՆ, 23 ՀՈՒՆՎԱՐԻ, ԱՐՄԵՆՊՐԵՍ։ Դիլիջան և Արևիկ ազգային պարկերում անցում է կատարվել շուրջօրյա հսկողության` շնորհիվ օնլայն ռեժիմով աշխատող տեսախցիկների։
«Արմենպրես»-ի հաղորդմամբ՝ այս մասին լրագրողների հետ զրույցում ասաց Վայրի բնության համաշխարհային հիմնադրամի (WWF) հայաստանյան մասնաճյուղի տնօրեն Կարեն Մանվելյանը։
«Որսագողությունը կանխարգելելու համար աշխատանքներ են տարվում։ ԲՀՊՏ-ներում անվտանգությունն ավելի արդյունավետ պահպանելու համար Դիլիջան և Արևիկ ազգային պարկերում տեղադրվել են 24 ժամ օնլայն ռեժիմով աշխատող տեսախցիկներ։ Ազգային պարկի ազնվացեղ եղջերուի ազատավանդակի հարակից տարածքներում նույնպես տեղադրվել են նմանատիպ տեսախցիկներ։ Նախատեսվում է այս տարի Իրանից 4 ազնվացեղ եղջերու ներմուծել և բազմացնել։ Կառավարման որոշ խնդիրներ կան, որոնք դեռ պետք է լավանան։ Այս տեսախցիկները ոչ միայն որսագողության, այլ նաև ազգային պարկերի տեսուչների աշխատանքը հսկելու համար է»,- նշեց Մանվելյանը։
Նա վստահեցրեց, որ տեսախցիկների տեղադրումը դեռ շարունակվելու է իրականացվել։ Բնության հատուկ պահպանվող տարածքներում տեղադրվել է 100 ֆոտոխցիկ, Դիլիջանում տեղադրված է օնլայն 10 տեսախցիկ, որոնցից 6-ը ազնվացեղ եղջերուի ազատավանդակի մոտ են, իսկ 4-ը պահակակետերի մոտ։ Արևիկ ազգային պարկում տեղադրված է 14 օնլայն տեսախցիկ։
Բաժանորդագրվեք մեր ալիքին Telegram-ում