Արարատի մարզում ճանապարհային երթևեկության կանոնների խախտման դեպքերը նվազել են
ԵՐԵՎԱՆ, 18 ՀՈՒՆՎԱՐԻ, ԱՐՄԵՆՊՐԵՍ: Արարատի մարզում 2017 թվականին ճանապարհային երթևեկության կանոնների խախտման 98 դեպք է գրանցվել՝ նախորդ տարվա 105 դեպքի դիմաց: Արարատի մարզի դատախազ Սևակ Հովհաննիսյանի խոսքով` 2017 թվականին մահվան ելքով 21 դեպք է գրանցվել, նախորդ տարվա 14 դեպքի դիմաց:
«Արարատի մարզն իր աշխարհագրական դիրքով գտնվում է մի այնպիսի վայրում, որ ճանապարհային երթևեկության կանոների խախտման բազմաթիվ դեպքեր են գրանցվում և այս տարին բացառություն չի: Գրանցված բոլոր դեպքերը բացահայտնվել են, բացառությամբ մեկ դեպքի»,- «Արմենպրես»-ի հաղորդմամբ` ասաց Հովհաննիսյանը:
Դատախազը նշեց, որ չբացահայտված դեպքը տեղի էր ունեցել Արարատ գյուղի Վազգեն Սարգսյանի տուն-թանգարանից մայրուղի մտնելու ճանապարհին. անհայտ վարորդը վրաերթի է ենթարկել քաղաքացուն և դիմել փախուստի:
«Տարբեր լայնածավալ քննչական և դատավարական գործողությունների արդյունքում պարզեցինք, որ ավտոմեքենան եղել է «Վոլցվագեն Գոլֆ» մակնիշի: Դեպքով հարուցվել է քրեական գործ 242 և 244 հոդվածների հատկանիշներով»-, ասաց Հովհաննիսյանը:
Բաժանորդագրվեք մեր ալիքին Telegram-ում