Քաղաքացիական ծառայության շրջանակն ընդլայնվելու է
ԵՐԵՎԱՆ, 18 ՀՈՒՆՎԱՐԻ, ԱՐՄԵՆՊՐԵՍ: Կառավարությունը հավանություն տվեց «Քաղաքացիական ծառայության մասին», «Հանրային ծառայության մասին» և հարակից օրենքներում փոփոխություններ և լրացումներ կատարելու մասին ՀՀ օրենքների նախագծերի փաթեթին:
ՀՀ փոխվարչապետ, Միջազգային տնտեսական ինտեգրման և բարեփոխումների նախարար Վաչե Գաբրիելյանը նշեց, որ նախագծի ընդունմամբ ընդլայնվելու է քաղաքացիական ծառայության շրջանակը, համապատասխան մարմիններն ունենալու են մարդկային ռեսուրսները կառավարելու օրենքով սահմանված հստակ լիազորություններ, բացի այդ, քաղաքացիական ծառայության համակարգը ապակենտրոնացվելու է:
«Փոփոխությունները պայմանավորված են նաև ՀՀ սահմանադրությանը համապատասխանեցնելու, պաշտոնների հստակ դասակարգում ունենալու հանգամանքով»,- «Արմենպրես»-ի փոխանցմամբ, ասաց փոխվարչապետը:
Այս օրենքով չեն կարգավորվում այն դրույթները, որոնք վերաբերում են Նախագահի աշխատակազմին, Ազգային ժողովի առանձնահատկություններին, վարչապետի աշխատակազմին, ինչպես նաև Սահմանադրական դատարանին և այն մարմիններին, որոնք ունեն առանձնահատկություններ:
Բաժանորդագրվեք մեր ալիքին Telegram-ում