Հայաստանում գրիպի դեմ պատվաստանյութի կազմն ամեն տարի փոխվում է
ԵՐԵՎԱՆ, 16 ՀՈՒՆՎԱՐԻ, ԱՐՄԵՆՊՐԵՍ: Հայաստանում գրիպի դեմ պատվաստանյութի կազմը, կախված հարուցիչի տեսակից, յուրաքանչյուր տարի փոխվում է: «Արմենպրես»-ի հաղորդմամբ` «Ազատություն» ռադիոկայանի ֆեյսբուքյան ասուլիսին Առողջապահության նախարարության վտանգավոր և օդակաթիլային վարակների համաճարակաբանության բաժնի պետ Լիանա Թորոսյանը նշեց, որ նախարարությունը սեզոնի սկզբին պատվաստանյութ է ներկրում: «Այս տարվա գրիպի դեմ պատվաստանյութը քառավալենտ էր»,-նշեց մասնագետը:
Նա հորդորեց խոցելի խմբում գտնվող վաղ տարիքի երեխաներին, հղիներին, ուղեկցող հիվանդություններ ունեցողներին եւ 65 տարեկանից բարձր անձանց անպայման պատվաստվել գրիպի դեմ: «Պատվաստանյութը կոչված է պաշտպանելու գրիպի ա եւ բ տեսակներից, ինչպես նաեւ գրիպի ա տեսակի երկու ենթատեսակներից»,-հավելեց Լիանա Թորոսյանը:
Նա հերքեց նաեւ համաճարակի մասին տարածված տեղեկությունները՝ նշելով, որ Հայաստանում համաճարակ որպես այդպիսին չի գրանցվել: «2009 թվականին Առողջապահության համաշխարհային կազմակերպությունը հայտարարեց համավարակի մասին` H1N1-ով պայմանավորված»,-նշեց նա:
Բաժանորդագրվեք մեր ալիքին Telegram-ում