«Հարությունյան» փայտափողային-դաշնամուրային քառյակը կներկայացնի Ֆրանսիս Պուլենկի ստեղծագործությունները
ԵՐԵՎԱՆ, 16 ՀՈՒՆՎԱՐԻ, ԱՐՄԵՆՊՐԵՍ: Արամ Խաչատրյանի տուն-թանգարանում հունվարի 18-ին հանդես է գալու Հայաստանի պետական սիմֆոնիկ նվագախմբի անսամբլ «Հարությունյան» փայտափողային-դաշնամուրային քառյակը՝ Լիլիթ Զաքարյան (դաշնամուր), Գևորգ Ավետիսյան (ֆլեյտա), Դավիթ Գյուլամիրյան (կլարնետ) և Նիկոլայ Պողոսյան (ֆագոտ) կազմով։
«Արմենպրես»-ի հաղորդմամբ, համերգը կայանալու է «Երաժշտական հինգշաբթի Խաչատրյանի տանը» ծրագրի շրջանակում։ Երեկոյի ընթացքում քառյակի երաժիշտներին միանալու են նաև ՀՀ վաստակավոր արտիստուհի Անահիտ Ներսիսյանը (դաշնամուր), Տիգրան Վարդանյանը (հոբոյ)։
Երաժշտասերներին ներկայացվելու է հետաքրքիր ծրագիր՝ կազմված ֆրանսիացի կոմպոզիտոր Ֆրանսիս Պուլենկի կամերային ստեղծագործություններից։Փայտափողային-դաշնամուրային քառյակն առաջին անգամ չէ, որ հանդես է գալու «Երաժշտական հինգշաբթի Խաչատրյանի տանը» նախաձեռնության շրջանակում։ Քառյակի երաժիշտները նկատում են, որ Խաչատրյանի թանգարանի միջավայրը, կազմակերպիչները տրամադրող են, և հաճելի է ներկայանալ նման հարթակում։
«Հարությունյան» փայտափողային-դաշնամուրային քառյակն իր կազմով եզակի է աշխարհում։ Քառյակը ստեղծվել է մեծանուն կոմպոզիտոր Ալեքսանդր Հարությունյանի 95-ամյակի առթիվ, անդրանիկ համերգը տեղի է ունեցել 2015-ի հոկտեմբերի 28-ին։ Երկամյա ստեղծագործական գործունեության ընթացքում անսամբլը ելույթներով հանդես է եկել Հայաստանում, Ռուսաստանի Դաշնությունում, Չինաստանում, Լիբանանում։
Բաժանորդագրվեք մեր ալիքին Telegram-ում