Նախորդ տարի Հայաստանի տնտեսական աճը կամփոփվի միջինում 6 տոկոսի սահմաններում. տնտեսագետ
ԵՐԵՎԱՆ, 12 ՀՈՒՆՎԱՐԻ, ԱՐՄԵՆՊՐԵՍ: Հայաստանի տնտեսական աճը 2017-ին կարող է ամփոփվել 5.8-6.2 տոկոսի սահմանում: «Արմենպրես»-ի հաղորդմամբ` այսպես է կարծում Հայաստանի պետական տնտեսագիտական համալսարանի ինովացիոն և ինստիտուցիոնալ հետազոտությունների կենտրոնի ղեկավար, տնտեսագետ Ատոմ Մարգարյանը` այն կապելով արտաքին և ներքին բարենպաստ գործոնների հետ:
Տնտեսագետի խոսքով` 2017-ին Հայաստանում վերականգնվեց մակրոտնտեսական պահանջարկը, որին նպաստեցին Ռուսաստանի տնտեսության կարգավորումը, ինչն էլ նպաստեց դեպի Հայաստան տրանսվերտների ավելացմանը, ներդրումային աշխուժացումը, պղնձի միջազգային բարձր գները:
«Այս գործոններին ավելացել է նաև վարկային ոլորտում աշխուժացումը: Բանկերը ավելի շատ են վարկավորել տնտեսությունը, այդ թվում` անհատներին, դա նպաստել է մակրոտնտեսական պահանջարկի ավելացմանը, որը տնտեսական աճի դասական գործոն է: Տնտեսական աճը միջին կանխատեսումներ կկազմի 5.8-6.2 տոկոս կամ միջինը 6 տոկոս»,-ասաց տնտեսագետը:
Բաժանորդագրվեք մեր ալիքին Telegram-ում