Հավակնորդների մրցաշարում բոլորի հնարավորությունները հավասար են. Լևոն Արոնյան
ԵՐԵՎԱՆ, 20 ԴԵԿՏԵՄԲԵՐԻ, ԱՐՄԵՆՊՐԵՍ: Հայաստանի շախմատի հավաքականի առաջատար, աշխարհի գործող գավաթակիր Լևոն Արոնյանը աշխարհի չեմպիոնի մրցախաղի համար հավակնորդների մրցախաղի մասնակիցների հնարավորությունները հավասար է համարում:
«Կարծում եմ, հավակնորդների մրցաշարի յուրաքանչյուր մասնակցի հնարավորությունները հավասար են 30 տոկոսի: Ամեն ինչ կախված է անհատական նախապատրաստությունից և խաղից: Բեռլինը ինձ համար դեռևս այնքան էլ հաջող վայր չէ, փորձելու եմ փոխել այն»,-«Արմենպրես»-ի հաղորդմամբ` Արոնյանի կարծիքը փոխանցում է RSport-ը:
Արոնյանի խոսքով անցնող տարին հաջող էր իր համար: «Ես շատ գոհ եմ, քանի որ այն սկսվեց վատ և ավարտվում է բավականին լավ: Ուզում եմ մի լավ վերջակետով ավարտել տարին՝ հաջող հանդես գալով արագ շախմատի աշխարհի առաջնությունում»,-ասել է Արոնյանը:
Գերմանիայի մայրաքաղաք Բեռլինում կայանալիք հավակնորդների մրցաշարին կմասնակցեն Լևոն Արոնյանը, Շախրիար Մամեդյարովը, Ֆաբիանու Կարուանան, Ուեսլի Սոն, Վլադիմիր Կրամնիկը, Դին Լիժենը, Ալեքսանդր Գրիշչուկը և Սերգեյ Կարյակինը: Հավակնորդների մրցաշարը կկայանա 2018 թվականի մարտի 10-28-ը: Հաղթողն իրավունք կստանա մասնակցելու աշխարհի չեմպիոնի կոչման մրցախաղին՝ Մագնուս Կարլսենի դեմ:
Բաժանորդագրվեք մեր ալիքին Telegram-ում