Բունդեսթագը քվեարկեց պատգամավորների աշխատավարձի բարձրացման օգտին
17:08, 14 Դեկտեմբեր 2017
ԵՐԵՎԱՆ, 14 ԴԵԿՏԵՄԲԵՐԻ, ԱՐՄԵՆՊՐԵՍ: Բունդեսթագը հաստատել Է պատգամավորների աշխատավարձերի ինքնաբերաբար բարձրացման օրինագիծը՝ Գերմանիայի քաղաքացիների անվանական եկամուտների աճին համապատասխան, տեղեկացնում Է «Արմենպրես»-ը:
Այսպիսով՝ առաջիկա չորս տարիներին հուլիսի 1-ին պատգամավորների աշխատավարձերն ինքնաբերաբար կավելանան, եթե շարունակվի գերմանական տնտեսության վերելքը: Նույն այդ սկզբունքը գործում Էր նաեւ նախորդ չորս տարիներին:
Նոր կառավարական կոալիցիայի բացակայությունը պատգամավորներին չի խանգարել քվեարկելու իրենց աշխատավարձի ինքնաբերաբար բարձրացման օգտին: Օրինագիծը պաշտպանել են 665 պատգամավորներից 505-ը, դեմ են քվեարկել 152-ը, գրում Է Deutsche Welle-ն:
ԳՖՀ-ի Բունդեսթագի պատգամավորների աշխատավարձը 2017 թվականի հուլիսի 1-ից ամսական կազմում Է 9542 եվրո: Այն ժամանակ աշխատավարձը բարձրացվել Է 2,3 տոկոսով կամ 215 եվրոյով, հաղորդել Է «Ինտերֆաքս»-ը:
Բաժանորդագրվեք մեր ալիքին Telegram-ում