Մանկական բեսթսելեր 4/22. Բույսն ամեն օր ջրող արջուկի մասին գիրքը ամենապահանջվածների ցանկում է
ԵՐԵՎԱՆ, 6 ԴԵԿՏԵՄԲԵՐԻ, ԱՐՄԵՆՊՐԵՍ: «Արմենպրես» լրատվական գործակալության «Մանկական բեսթսելեր» հեղինակային նախագիծը ներկայացնում է մեկ ամսվա ընթացքում ամենից շատ վաճառված մանկական գրքերի ցանկը:
Առաջին հորիզոնականում «Հեքիաթներ բարու և չարի մասին» գիրքն է: Այն ներառում է փոքրիկներին հետաքրքրող ստեղծագործություններ:
Հովհաննես Թումանյանի «Հեքիաթներ»-ը երկրորդն են: Հեղինակի լավագույն գործերը զետեղված են այդ գրքում:
Երրորդ հորիզոնականում Հանս Քրիստիան Անդերսենի «Հեքիաթներ»-ն են: Անդերսենյան գործերը քաջ հայտնի են բոլոր փոքրիկներին ոչ միայն գրքերից, այլև մուլտֆիլմերից ու լիամետրաժ խաղարկային ֆիլմերից, քանի որ դրանց զգալի մասն էկրանավորվել է:
«Պապն ու շաղգամը» հայտնի հեքիաթը չորրորդն է: Հեքիաթի առանցքում համատեղ ուժերով նպատակին հասնելու գաղափարն է: Շաղգամը հողից հանելու համար պապիկին օգնության հասած թոռնիկին են միանում շունը, կատուն, անգամ մուկը:
Իր դիրքերը զիջել և հինգերորդ տեղում է հայտնվել Հովհաննես Թումանյանի «Հեքիաթներ»-ը: Թումանյանի ստեղծագործությունները, մասնավորապես, հեքիաթները, որոնք թարգմանվել են աշխարհի տարբեր լեզուներով, մշտապես հետաքրքրել են ընթերցողներին: Դրանք միշտ պահանջված են բոլոր սերունդների կողմից, հաճույքով են կարդում նաև մեծահասակները: Հեքիաթների հիմքում ընկած են ժողովրդական թեմաներն ու պատումները:
Վեցերորդ տեղում կրկին Հովհաննես Թումանյանի գործերն են: «Հեքիաթներ, թարգմանություններ»:
«Հայ ժողովրդական հեքիաթներ»-ը այս անգամ յոթերորդն է: Գրքում ներկայացված են հեքիաթներ, որոնք չափազանց հետաքրքիր են և դաստիարակչական նշանակություն ունեն:
Ութերորդ տեղում Կատարինա Մացուրովայի «Ինչպես ծաղկեց գազարը» գիրքը: Այն արջուկի մասին է, որն ամեն օր ջրում էր բույսը, հովանոցով պաշտպանում արևի ճառագայթներից և երբեք չէր մոռանում քնելուց առաջ բարի գիշեր մաղթել նրան: Բայց բույսը ոչ մի կերպ չէր արձագանքում: «Ախր ինչու՞ չես ծաղկում »,- տրտում մտածում էր արջուկը: Բայց արի ու տես, որ նա չէր էլ պատկերացնում, թե ի՜նչ է կատարվում հողի տակ:
Ուրլիխ Հուբի «Տապանի մոտ ժամը ութին» գիրքն իններորդն է: Աստված էլի դժգոհ է աշխարհից, մարդկանցից ու կենդանիներից: Աշխարհն արդեն երկրորդ անգամ ողողվելու է ջրով: Նոյի աղավնին զգուշացնում է բոլորին: Վերջապես գտնում է նաև վերջին երկուսին՝ երկու պինգվինի, և նրանց հանձնում տապանի տոմսերը: Անձրևն արդեն սկսվել է: Պետք է շտապել: Իսկ ճամպրուկները կապող պինգվիններին մի միտք է անհանգստացնում` ինչպես փրկել երրորդ պինգվինին: Երկու տոմս, երեք պինգվին. ինչպե՞ս վարվել: Հավատարիմ ընկերները որոշում են ճամպրուկում իրերի փոխարեն տեղավորել իրենց փոքրիկ ընկերոջը:
Ալիս Բրիեռ-Հաքետի «Պետրոսիկը և լուսինը» գիրքը եզրափակում է ամենավաճառվածների ցանկը: Պետրոսիկը փոքրիկ տղա է, ով շատ է ցանկանում նվիրել իր մայրիկին նվերներից ամենագեղեցիկը՝ Լուսինը: Այո՛, բայց Լուսինը շատ բարձր է: Պետրոսիկը բոլորից օգնություն է խնդրում. յուրաքանչյուրին խոստանում է Լուսնից մի փոքրիկ կտոր… Բայց այն կբավականացնի՞ բոլոր մարդկանց:
Վարկանիշային ցուցակի կազմման հարցումներին մասնակցել են «Բուկինիստ» (53-74-13) և «Զանգակ» (23-26-49) գրախանութների ցանցերը: Հարցման ժամանակ հաշվի չեն առնվել դասագրքերը:
Տեղ | Գիրք | Հրատ. | Քանակ | |
1 | «Հեքիաթներ բարու և չարի մասին» | Բուկինիստ | 31 | |
2 |
Հովհաննես Թումանյան «Հեքիաթներ» |
Ջի Էս Էմ | 31 | |
3 |
Հանս Քրիստիան Անդերսեն «Հեքիաթներ» |
Արևիկ | 30 | |
4 | «Պապն ու շաղգամը» | Բուկինիստ | 30 | |
5 |
Հովհաննես Թումանյան «Հեքիաթներ» |
Արևիկ | 27 | |
6 |
Հովհաննես Թումանյան «Հեքիաթներ, թարգմանություններ» |
ՄՀՄ գրատուն | 22 | |
7 | «Հայ ժողովրդական հեքիաթներ» | Արևիկ | 21 | |
8 |
Ուրլիխ Հուբ «Տապանի մոտ ժամը ութին» |
Զանգակ | 10 | |
9 |
Կատարինա Մացուրովա «Ինչպես ծաղկեց գազարը» |
Զանգակ | 7 | |
10 |
Ալիս Բրիեռ Հաքետ «Պետրոսիկը և լուսինը» |
Զանգակ | 7 |
«Մանկական բեսթսելերը» ներկայացրեց Անժելա Համբարձումյանը
Բաժանորդագրվեք մեր ալիքին Telegram-ում