Եգիպտոսում ահաբեկչության զոհերի թիվը հասել Է 120-ի. երկրում եռօրյա սուգ Է հայտարարված
ԵՐԵՎԱՆ, 24 ՆՈՅԵՄԲԵՐԻ, ԱՐՄԵՆՊՐԵՍ: Եգիպտոսի Սինայի թերակղզու հյուսիսում նոյեմբերի 24-ին մզկիթի վրա զինյալների ձեռնարկած գրոհի զոհ Է դարձել 120 մարդ, տուժել են եւս շուրջ 80 հոգի: Այդ մասին, ինչպես տեղեկացնում Է «Արմենպրես»-ը, հայտնել Է Al-Ahram թերթը՝ վկայակոչելով իշխանական կառույցների աղբյուրներ:
Ավելի վաղ MENA պետական լրատվական գործակալությունը հայտնել Էր, որ մզկիթի վրա զինյալների գրոհի հետեւանքով զոհվել Է 85, տուժել 80 մարդ: Մզկիթի վրա հարձակումը կատարվել Է Հյուսիսային Սինայի մայրաքաղաք Էլ Արիշայից 30 կիլոմետր արեւմուտք գտնվող Էր Ռաուդա բնակավայրում ուրբաթօրյա աղոթքի ժամանակ: Չորս արտաճանապարհայիններով ժամանած ահաբեկիչները պայթուցիկ սարք են գործի դրել աղոթողների մեջ, իսկ այնուհետեւ անկանոն կրակ բացել մարդկանց վրա: Նշվում Է, որ հարձակվողները նաեւ գնդակոծել են շտապօգնության մեքենաները, որոնք վիրավորներին տարհանում Էին գրոհի վայրից:
Հյուսիսային Սինայի բոլոր հիվանդանոցներում ու հոսպիտալներում արտակարգ դրություն Է հայտարարված: Բանակի եւ ոստիկանության ստորաբաժանումները տեղանքի սանրման գործողություն են անցկացնում: Տեղի ունեցածի կապակցությամբ Եգիպտոսի նախագահ Աբդել Ֆաթահ աս Սիսին երկրի Ազգային անվտանգության խորհրդի արտակարգ նիստ Է գումարել ուժային գերատեսչությունների ղեկավարների մասնակցությամբ: Ներքին գործերի նախարարությունն արդեն ահաբեկչության հետաքննության հատուկ հանձնաժողով Է ստեղծել, ինչպես նաեւ կարգադրել Է ուժեղացված հսկողության տակ առնել պետական ու հասարակական բոլոր հիմնարկությունները, այդ թվում՝ մզկիթներն ու եկեղեցիները:
Նախագահի կարգադրությամբ, երկրում եռօրյա համազգային սուգ Է հայտարարված ահաբեկչական գրոհի զոհերի հիշատակին: Եգիպտոսում գործող ծայրահեղական խմբավորումներից ոչ մեկն առայժմ չի ստանձնել հարձակման պատասխանատվությունը, հաղորդել Է ՏԱՍՍ-ը:
Բաժանորդագրվեք մեր ալիքին Telegram-ում