Վարդան Հարությունյանը վստահեցնում է` բյուջեի հարկային եկամուտների մեծ մասն ապահովում է խոշոր բիզնեսը
ԵՐԵՎԱՆ, 24 ՆՈՅԵՄԲԵՐԻ, ԱՐՄԵՆՊՐԵՍ: Հայաստանի կառավարությանն առընթեր պետական եկամուտների կոմիտեի նախագահ Վարդան Հարությունյանը վստահեցնում է, որ պետական բյուջեի հարկային եկամուտների մեծ մասն ապահովում է ոչ թե փոքր ու միջին, այլ խոշոր բիզնեսը: Ազգային ժողովում լրագրողների հետ զրույցում Վարդան Հարությունյանը խոստացավ մյուս շաբաթվա ընթացքում դրա վերաբերյալ ամփոփ տեղեկատվություն ներկայացնել: «Միգուցե, փորձենք մամուլի ասուլիսի միջոցով ներկայացնել, որ դուք էլ համոզվեք, որ այսօր բյուջեի հարկային եկամուտների մեծ մասն ապահովվում է ոչ թե փոքր և միջին բիզնեսի հաշվին, ինչպես պատերի տակ ոմանք խոսում են, այլ հենց խոշորի հաշվին»,- «Արմենպրես»-ի հաղորդմամբ` ասաց ՊԵԿ նախագահը:
Վարդան Հարությունյանը հերքեց շրջանառվող խոսակցությունները, թե ինքը թիրախավորել է ԲՀԿ առաջնորդ Գագիկ Ծառուկյանին, քանի որ նրա ընկերություններում ստուգումներ են իրականացվում: «Հիմա ում մոտ ստուգումներ են, նշանակում է ես նրանց թիրախավորե՞լ եմ: Այդպիսի բան չի լինում: Ես ընդհանրապես ի պաշտոնե, նաև որպես Հայաստանի Հանրապետության քաղաքացի որևէ մեկին թիրախավորելու իրավունք չունեմ: Բոլորի մոտ ստուգումներ են իրականացվում, բայց դա չի նշանակում, որ մենք բոլորին թիրախավորում ենք: Մենք մեր գործն ենք անում»,- ասաց ՊԵԿ նախագահը:
Անդրադառնալով «Առինջ մոլ» առևտրային կենտրոնում գործունեություն ծավալող առևտրականների դժգոհություններին` Վարդան Հարությունյանը շեշտեց, որ բոլորը պարտավոր են աշխատել օրենքի շրջանակում:
Բաժանորդագրվեք մեր ալիքին Telegram-ում