Հայաստանում ռուսական ռազմակայանի կրտսեր հրամանատարների հավաքներ են անցկացվում
ԵՐԵՎԱՆ, 24 ՆՈՅԵՄԲԵՐԻ, ԱՐՄԵՆՊՐԵՍ: Հայաստանի ռուսական ռազմակայանում ստորաբաժանումների ջոկերի, մարտական մեքենաների, անձնակազմերի ու հաշվարկների հրամանատարների հետ հրահանգչա-մեթոդական պարապմունքներ են սկսվել նոր ուսումնական շրջանին պատրաստվելու շրջանակներում:
Ինչպես «Արմենպրես»-ին տեղեկացրին ՌԴ Հարավային ռազմական օկրուգի մամուլի ծառայությունում, զորամիավորման զինծառայողները մասնագիտացված դասարաններում եւ «Կամխուդ» ու «Ալագյազ» զորափորձարաններում անցկացվող պարապմունքների ընթացքում ինչպես տեսական, այնպես Էլ գործնական գիտելիքներ ու հմտություններ են ստանում մարտական պատրաստության կազմակերպման վերաբերյալ:
Ռուսական զորամիավորման սերժանտների հետ անցկացվող հավաքների հիմնական նպատակներն են՝ պրոֆեսիոնալ-պաշտոնեական պատրաստության մակարդակի բարձրացումը անձնակազմի հետ պարապմունքներ անցկացնելիս, իրավակարգի եւ զինվորական կարգապահության ամրապնդումը:
Ընդամենը պարապմունքներում ներգրավված են 500-ից ավելի զինծառայողներ եւ ավելի քան 50 միավոր ռազմական տեխնիկա, այդ թվում՝ հետախուզման, կապի, նավիգացիայի եւ անօդաչու ավիացիայի ժամանակակից համալիրներ:
Բաժանորդագրվեք մեր ալիքին Telegram-ում