«Cilicia» բիզնես-ակումբը մասնաճյուղ է բացում Հայաստանում
ԵՐԵՎԱՆ, 24 ՆՈՅԵՄԲԵՐԻ, ԱՐՄԵՆՊՐԵՍ: Երևանում կբացվի «Cilicia» բիզնես-ակումբի հայաստանյան մասնաճյուղը: Բացման հանդիսավոր արարողությունը տեղի կունենան նոյեմբերի 25-ին ժամը 15:00-ին Marriot հյուրանոցի Ararat սրահում:
Ինչպես հաղորդում է «Արմենպրես»-ը, «Cilicia» բիզնես-ակումբի մասնաճյուղի բացման առիթով մի շարք նշանակալի միջոցառումներ կանցկացվեն նոյեմբերի 25-ին և 26-ին: Բացման հանդիսավոր արարողությունից բացի, կստորագրվի նաև համաձայնագիր «Cilicia» բիզնես-ակումբի և DFA-ի /Հայաստանի զարգացման հիմնադրամի/ միջև: Նաև կկազմակերպվի հանդիսավոր ընթրիք ակումբի ստեղծման երրորդ տարեդարձի առիթով: Իսկ հաջորդ օրը նախատեսված է բիզնես նախաճաշ: Միջոցառումներին ներկա կլինեն պատվիրակություններ Ռուսաստանից, ինչպես նաև հյուրեր Հայաստանից:
«Cilicia» բիզնես-ակումբի Երևանյան մասնաճյուղի բացման նպատակն է բարձրացնել Հայաստանի և Ռուաստանի գործարարների միջև համագործակցության որակը և վերացնել խոչընդոտները, քանի որ կա զարգացման մեծ ներուժ:
«Մենք ստեղծում ենք վստահության մթնոլորտ «Cilicia» բիզնես-ակումբում, որտեղ անդադար կարելի է բարձրացնել բիզնես տեղեկացվածության մակարդակը, ձեռք բերել նոր ծանոթություններ ու գործընկերներ, գտնել նոր գնորդներ ու մատակարարներ, քննարկել նոր գաղափարներ, ներգրավել ներդրողներին ու ներդրումներ կատարել», - ասում է մասնաճյուղի տնօրեն Արթուր Սարգսյանը:
«Cilicia» բիզնես-ակումբը ստեղծվել է 2014 թ-ի նոյեմբերին Մոսկվայում: Նախաձեռնության հեղինակն ու հիմնադիրը Նվեր Սարգսյանն է: «Cilicia»-ն բիզնեսի, խոշոր ընկերությունների ներկայացուցիչների և տարբեր մասնագետների բազմակողմանի համագործակցության հարթակ է: Այսօր ակումբը մեկտեղում է 180 գործարարի աշխարհի տարբեր երկրներից, որոնք զբաղվում են տնտեսության տարբեր ճյուղերով՝ ներառյալ էներգետիկ, IT , բանկային, ապահովագրության ոլորտները, ինչպես նաև ներկայացնում են խորհրդատվության, արտադրույթան, առևտրային ցանցերի, դիստրիբյուտորական, fashion, HoReCa և այլ բնագավառներ, որոնց տարեկան շրջանառությունը կազմում է ավելի քան 700 մլն ԱՄՆ դոլար:
Բաժանորդագրվեք մեր ալիքին Telegram-ում