Կրթության և գիտության ոլորտում ՀՀ և ՌԴ համագործակցությունն ակտիվ փուլում է. ԵՊՀ ռեկտոր
ԵՐԵՎԱՆ, 22 ՆՈՅԵՄԲԵՐԻ, ԱՐՄԵՆՊՐԵՍ: Կրթության և գիտության ոլորտում Հայաստանի ու Ռուսաստանի համագործակցությունը ակտիվ փուլում է: Հայաստանյան գիտական, կրթական հաստատություններն ինտենսիվ աշխատում են ռուսական համապատասխան կառույցների հետ:
«Արմենպրես»-ի հետ զրույցում Երևանի պետական համալսարանի ռեկտոր Արամ Սիմոնյանը նշեց, որ կրթության և գիտության ոլորտում ներկայում ռուսական համապատասխան հաստատությունների հետ աշխատելու գործընթացում լավ աշխուժացում է նկատվում:
«Հինգ տարի առաջվա հետ համեմատությամբ ներկայում իսկապես աշխուժացում է նկատվում: Մասնավորապես, սկսում ենք վերականգնել այն կապերը, որոնք ունեինք վաղուց, սակայն 90-ականներին ընդհատվել էին տարբեր պատճառներով՝ ֆինանսավորման բացակայություն, կադրերի փոփոխություն և այլն: Հիմա այդ ամենը վերընթաց ուղու վրա է: Նախ՝ ՀՀ ԳԱԱ-ն լիարժեք համագործակցում է իր ՌԴ գործընկերների հետ: Մեր բուհերն էլ ետ չեն մնում: Մասնավորապես, ԵՊՀ-ն ոչ միայն վերականգնել է նախկինում ունեցած կապերը, այլև նորերն է ձեռք բերել, զարգացրել հարաբերությունները, հատկապես, դաշնային համալսարանների հետ, որոնք այսօր նկատելիորեն դերակատարություն ունեն ՌԴ կրթության և գիտության զարգացման գործում»,-ասաց ԵՊՀ ռեկտորը: Նա որպես օրինակ նշեց Դոնի Ռոստովում գտնվող Ռուսաստանի հարավային դաշնային համալսարանը, Եկատերինբուրգի, Սանկտ Պետերբուրգի, Մոսկվայի համալսարանները, որոնց հետ ԵՊՀ-ն բավական սերտ կապեր ունի:
Արամ Սիմոնյանը տեղեկացրեց, որ այս օրերին Հայաստանում են պատվիրակություններ Ուրալի դաշնային համալսարանից և Մոսկվայի երկու համալսարաններից, որոնք ոչ միայն կրթական ոլորտում կնքել են համաձայնագրեր, այլև կոնկրետացրել մի շարք ծրագրեր:
«Մասնավորապես, հստակեցվել են ուսանողների փոխանակման բնագավառում մեր անելիքները, նախատեսվում է համատեղ գիտահետազոտական աշխատանքներ սկսել, հիմնականում հումանիտար ոլորտում՝ միջազգային հարաբերություններ, սոցիոլոգիա: Այլ ուղղություններով ևս համագործակցում ենք ռուսական բուհերի հետ: Օրինակ, ֆիզիկայի բնագավառում միշտ էլ լավ գործակցություն ենք ունեցել Դուբնայի միջազգային համալսարանի հետ: Վերջերս այդ համալսարանից նույնպես պատվիրակություն էր եկել Հայաստան»,-ավելացրեց ԵՊՀ ռեկտորը: Նրա խոսքով, Ռուսաստանի բուհերի հետ փոխայցելություններ հաճախ են կազմակերպվում, համատեղ ծրագրերի թիվն է ավելացել:
«Այնպես որ, կրթության և գիտության ոլորտում համագործակցության համատեքստում այսօր տիրող վիճակից չեմ կարող դժգոհել, ամեն դեպում հնարավորություններն ավելի շատ են, որոնք պետք է օգտագործել՝ համատեղ հրատարակություններ, գիտաժողովներ, հետազոտական աշխատանք… Այս ոլորտներում անելիքներ միշտ էլ կան»,-եզրափակեց Արամ Սիմոնյանը:
Բաժանորդագրվեք մեր ալիքին Telegram-ում