ԵՐԵՎԱՆ, 21 ՆՈՅԵՄԲԵՐԻ, ԱՐՄԵՆՊՐԵՍ: Քաղաքապետարանում կայացած աշխատանքային խորհրդակցության ժամանակ քաղաքապետ Տարոն Մարգարյանն անդրադարձել է Երևանի քաղաքապետարանի կողմից ամեն տարի  հայտարարվող «Ամանորյա լավագույն ձևավորում» մրցույթին, որի  շրջանակում առանձնակի կարևորվում են ինչպես մասնավորի, այնպես էլ անհատ քաղաքացիների կողմից յուրօրինակ և հետաքրքրական լուծումներ առաջարկող  աշխատանքները։

«Մեր կողմից Ամանորի տոներին ընդառաջ «Ամանորյա լավագույն ձևավորում» ամենամյա մրցույթի անցկացումն արդեն դարձել է բարի ավանդույթ: Սա լավ առիթ է խրախուսելու մեր քաղաքացիներին, տնտեսվարողներին, որպեսզի նրանք ևս միանան քաղաքի Ամանորի տոնական ձևավորմանը՝ լրացուցիչ տոնական տեսք հաղորդելով մեր Երևանին»,- նշել է քաղաքապետը:

Աշխատակազմի արտաքին ձևավորման և գովազդի վարչությանն էլ հանձնարարվել է  այս տարի ևս անցկացնել մրցույթը և ապահովել վարչական շրջանների, տնտեսվարողների կազմակերպությունների, հասարակական կազմակերպությունների և անհատ քաղաքացիների ակտիվ մասնակցությունը: