ԵՐԵՎԱՆ, 21 ՆՈՅԵՄԲԵՐԻ, ԱՐՄԵՆՊՐԵՍ: Հանրապետությունում 2017 թվականին 524 հազար 485 մարդ կենսաթոշակի իրավունք ունեցող շահառու է համարվում: Նրանցից 460 հազար 485-ը ստանում է աշխատանքային կենսաթոշակ, 64 հազարը` ծերության նպաստ: «Արմենպրես»-ի հաղորդմամբ`այս մասին իր պաշտոնավարման 100 օրն ամփոփող մամուլի ասուլիսին ասաց Սոցիալական ապահովության պետական ծառայության պետ Հովհաննես Սահակյանը: Նրա խոսքով` տարվա ընթացքում ծննդյան միանվագ նպաստ է նշանակվել 34 հազար 786 հոգու: Մինչեւ երկու տարեկան երեխաների խնամքի նպաստ ստացել է 8327, մայրության նպաստ`22 հազար 990 մարդ: «Մեր համակարգ տարեկան մուտքագրվում է 250 հազար դիմում»,-նշեց Սահակյանը:

Նա ոլորտի առջեւ ծառացած ամենակարեւոր խնդիրներից մեկը համարեց գործատուների կողմից ոչ իրավաչափ կամ չհիմնավորված ստաժերի նշանակումը: «Մենք այս համակարգում փոփոխություններ անելով ցանկանում ենք վերականգնել արդարությունը: Եթե մարդը հալալ քրտինքով աշխատել է. կստանա իր աշխատած տարիներին համապատասխան կենսաթոշակ, եթե ոչ` ծերության նպաստ»,-ասաց Հովհաննես Սահակյանը՝ հավելելով, որ 3000 տարվա կեղծ ստաժի դիմաց արդեն իսկ 14 միլիոնից ավել գումար են արձանագրել, որից 4-5 միլիոնն արդեն հետ է գանձվել պետական բյուջե: