Գործ է հարուցվել Ջիգարխանյանի առանձնասենյակում գաղտնալսող սարքերի հայտնաբերումից հետո
15:33, 15 Նոյեմբեր 2017
ԵՐԵՎԱՆ, 15 ՆՈՅԵՄԲԵՐԻ, ԱՐՄԵՆՊՐԵՍ: Մոսկվացի քննիչները ԽՍՀՄ ժողովրդական արտիստ Արմեն Ջիգարխանյանի անձնական կյանքին միջամտելու վերաբերյալ քրեական գործ են հարուցել այն բանից հետո, երբ թատրոնի նրա առանձնասենյակում գաղտնալսող սարքեր են հայտնաբերվել: Այս մասին, ինչպես տեղեկացնում է «Արմենպրես»-ը, «Ինտերֆաքս»-ին հայտնել է իրազեկ մի աղբյուր:
«Ջիգարխանյանի առանձնասենյակում գաղտնի տեսագրության եւ ձայնագրության տեխնիկական միջոցների հայտնաբերման փաստով հարուցվել է քրեական գործ Ռուսաստանի Դաշնության Քրեական օրենսգրքի 138-րդ հոդվածով (նամակագրության, հեռախոսազրույցների եւ այլ հաղորդագրությունների գաղտնիության խախտում)»,- նոյեմբերի 15-ին ասել է գործակալության զրուցակիցը:
Նրա խոսքով՝ նախօրյակին հետաքննության շրջանակներում քննիչները քննչական գործողություններ են կատարել Ջիգարխանյանի կնոջ՝ Վիտալինա Ցիմբալյուկ Ոոմանովսկայայի եւ նրա ներկայացուցիչ Իրինա Մազուրի բնակարաններում: Միեւնույն ժամանակ, նշել է աղբյուրը, քրեական գործում առայժմ ֆիգուրանտներ չկան:
Բաժանորդագրվեք մեր ալիքին Telegram-ում