Սպասվող լրահոս. 13.11.2017
ԵՐԵՎԱՆ, 13 ՆՈՅԵՄԲԵՐԻ, ԱՐՄԵՆՊՐԵՍ: «Արմենպրես» լրատվական գործակալությունը Լրատվական ռադիոյի եթերում ներկայացնում է այն ամենն, ինչի մասին կկարդաք, կլսեք ու կտեսնեք այսօրվա լրահոսում:
Այսօր` նոյեմբերի 13-ին, լրագրողների հետ կհանդիպի ՀՀ տնտեսական զարգացման և ներդրումների նախարարության Շուկայի վերահսկողության տեսչական մարմնի ղեկավար Լևոն Խալիկյանը: Նա կներկայացնի ոչ պարենային ապրանքների ոլորտում առկա իրավիճակը, խնդիրներն ու դրանց լուծմանն ուղված աշխատանքները:
«Տաշիր Գրուպ»-ն այսօր կներկայացնի ներդրումների ծրագիրը եւ տեղի կունենա հուշագրի ստորագրում:
ՀՀ ԳԱԱ-ում կմեկնարկի «Մերձավոր Արևելքի աստղագիտական ժառանգությունը» խորագրով միջազգային քառօրյա գիտաժողովը: Այն նվիրված է հնագույն քաղաքակրթությունների օրրանի՝ Մերձավոր Արևելքի, աստղագիտական ժառանգությանը: Միջազգային խորհրդաժողովի նպատակն է մեկտեղել աստղագետների, պատմաբանների, հնագետների և համատեղ քննարկումների միջոցով մշակել պատմաաստղագիտության և մշակութային աստղագիտության հիմնահարցերը:
Բնապահպան, «Թռչնասերների կենտրոն» ՀԿ նախագահ Սիլվա Ադամյանը, կենդանապաշտպան Կարինե Փանոսյանը և «Փրո Փոուզ» կենդանապաշտպան բարեգործական կազմակերպության հայաստանյան ներկայացուցիչ Նարե Արամյանը հանդես կգան մամուլի ասուլիսով: Նրանք կխոսեն Հայաստանում ապօրինի որսի դեպքերի և դրանցից բխող հետևանքների մասին:
Նոյեմբերի 13-ը կույրերի միջազգային օրն է: Ֆրանսիայում 1745 թվականին հենց այդ օրն է ծնվել հանրահայտ ուսուցիչ Վալենտին Հայուին, ով Փարիզում ու Պետերբուրգում հիմնել է կույրերի համար նախատեսված մի քանի դպրոց ու կազմակերպություն: Նա է առաջինը ստեղծել հատուկ տառատեսակներ, որոնց օգնությամբ կույրերը կարողացել են կարդալ: Օրվա թեմայով այսօր նախատեսված են մի շարք քննարկումներ: Կույրերի առողջական խնդիրներին, զբաղվածության և այլ հարցերին կանդրադառնան ոլորտի մասնագետները:
Մանկական «Եվրատեսիլ-2017» երգի միջազգային մրցույթի հայաստանյան ներկայացուցիչ Միշան այսօր Երևանում կներկայացնի իր եվրատեսիլյան «Բումերանգ» երգը: Համերգի ընթացքում Միշայի կողքին կլինեն ու իրենց ելույթներով հաջողություն կմաղթեն Լիդուշիկը, «Արեվիկ» մանկապատանեկան անսամբլը, Դալիթան, Մերի Քոչարյանը և այլք: «Մանկական Եվրատեսիլ-2017» երգի միջազգային մրցույթը տեղի կունենա Վրաստանի մայրաքաղաք Թբիլիսիում նոյեմբերի 26-ին, որտեղ բացի մեր հայրենակից Միշայից կմասնակցեն եւս 15 երկրներների ներկայացուցիչներ:
Մարզական անցուդարձից: «Հանրապետական» մարզադաշտում կկայանա Հայաստան- Կիպրոս ֆուտբոլային ընկերական հանդիպումը: Հիշեցնենք, օրեր առաջ Արթուր Պետրոսյանի գլխավորած թիմը Երեւանում ընկերական հանդիպում էր անցկացրել նաեւ Բելառուսի հավաքականի հետ եւ հաղթել 4:1 հաշվով:
Այս և այլ թեմաների մասին կարող եք մանրամասն ընթերցել armenpress.am կայք էջում և լսել լրատվական ռադիոյի եթերում: Հետևեք մեզ թվիթերում և ֆեյսբուքում:
Բաժանորդագրվեք մեր ալիքին Telegram-ում