Ժամանակը Երևանում՝ 11:07:36,   6 Ապրիլ

«Արմենպրես»-ն ամփոփում է անցնող շաբաթվա կարևորագույն իրադարձությունները

«Արմենպրես»-ն ամփոփում է անցնող շաբաթվա կարևորագույն իրադարձությունները

ԵՐԵՎԱՆ, 5 ՆՈՅԵՄԲԵՐԻ, ԱՐՄԵՆՊՐԵՍ: Անցնող շաբաթը գերհագեցած էր ներքին ու արտաքին բազմաթիվ ուշագրավ իրադարձություններով։ «Արմենպրես»-ը ներկայացնում է շաբաթվա կարևորագույն ու հետաքրքիր իրադարձությունների ամփոփ պատկերը:

Ղարաբաղյան հակամարտություն

Խորհրդային Միության կողմից «բաժանիր, որ տիրես» քաղաքականության պատճառով ԽՍՀՄ փլուզումը վիճարկելի տարածքներում կործանարար պատերազմների պատճառ դարձավ: Հետխորհրդային տարածքում ամենաերկարատև խնդիրն առաջացավ Հայաստանի և Ադրբեջանի միջև՝ Լեռնային Ղարաբաղի/Արցախի շուրջ: Եվ այս հակամարտությունը յուրահատուկ է, քանի որ այն միջնորդավորված պատերազմ չէ Ռուսաստանի և Արևմուտքի միջև, և հետաքրքիր է այն դիտարկել հակամարտության վաղ շրջանում Ամերիկայի դիրքորոշման տեսանկյունից: Այս մասին հեղինակավոր Forbes պարբերականում հրապարակված հոդվածում գրում են Կովկասի հարցերով փորձագետներ Մովսես Տեր-Հովհաննիսյանն ու Սուրեն Սարգսյանը: «Որպեսզի միջազգային հանրությունը Ադրբեջանից լայնամասշտաբ ռազմական արկածախնդրություն չակնկալի, ինչպես տեղի ունեցավ 2016 թվականի ապրիլին, ԱՄՆ-ն պետք է վերանայի իր դիրքորոշումը՝ օգնություն տրամադրելու առանց այն էլ հարուստ ագրեսորին, որը խախտում է ԱՄՆ օրենքը»,- եզրափակել են հեղինակները:

Եթե Ադրբեջանը ցանկանում է, որ Հայաստանը միանա Բաքու-Թբիլիսի-Կարս երկաթգծին, ապա պետք է ճանաչի Արցախի անկախությունը՝ որպես դե յուրե անկախ պետություն: Այս մասին ասաց ՀՀ ԱԺ փոխնախագահ Էդուարդ Շարմազանովը՝ անդրադառնալով Ադրբեջանի արտաքին գործերի նախարար Էլմար Մամեդյարովի այն հայտարարությանը, թե Հայաստանը կարող է Բաքու-Թբիլիսի-Կարս երկաթգծին միանալ միայն այն դեպքում, երբ դուրս բերի զորքերը, իրենց ձևակերպմամբ, «Ադրբեջանի օկուպացված տարածքներից»: «Նախ օկուպացված տարածքներից Ադրբեջանը պետք է դուրս բերի իր զորքերը, մասնավորապես՝ Գետաշենից, Մարտունաշենից ու Շահումյանից: Եթե կան օկուպացված տարածքներ, ապա դրանք օկուպացված են Ադրբեջանի կողմից: Երկրորդը՝ եթե Ադրբեջանը ցանկանում է, որ Հայաստանը միանա տարածաշրջանային նման նախագծերի, ապա ինքը պետք է ճանաչի Արցախի անկախությունը՝ որպես դե յուրե անկախ պետություն»,- ասաց Շարմազանովը:

Եվրանեսթի Բյուրոն ընդունել է Եվրոպական Խորհրդարանի և Հայաստանի, Ադրբեջանի, Վրաստանի, Մոլդովայի ու Ուկրաինայի խորհրդարանների պատվիրակությունների ղեկավարների համատեղ ուղերձը: Կոչ է արվում անհապաղ դադարեցնել ռազմական գործողությունները հայկական եւ ադրբեջանական ուժերի միջեւ, հասնել Լեռնային Ղարաբաղի հակամարտության կարգավորմանը, որը չունի ռազմական լուծում, այլ միայն բովանդակային բանակցությունների վերսկսման, բարեխղճորեն եւ վստահության բարձրացմանն ուղղված միջոցառումների եւ երկխոսության միջոցով:

Արցախի պաշտպանության բանակի  հյուսիսարևելյան ուղղությամբ տեղակայված զորամասերից մեկում նոյեմբերի 4-ին՝ ժամը 12:10-ի սահմաններում, հակատանկային նռնակի պայթյունի հետևանքով մահացու վիրավորում է ստացել ՊԲ զինծառայող, 1997թ. ծնված Հրանտ Խաչատուրի Մանգասարյանը, իսկ զինծառայողներ Գևորգ Վլադիսլավի Հյուսնունցը և Սերգեյ Սևադայի Ալումյանը ստացել են տարբեր աստիճանի բեկորային վիրավորումներ:

ԵԱՀԿ Մինսկի խմբի համանախագահներընոյեմբերի կեսերին կհանդիպեն Հայաստանի ու Ադրբեջանի արտաքին գործերի նախարարների հետ: Այս մասին հայտնել է Ադրբեջանի արտգործնախարար Էլմար Մամեդյարովը: ԵԱՀԿ Մինսկի խմբի համանախագահներն Ադրբեջանի արտաքին գործերի նախարար Էլմար Մամեդյարովի հետ կհանդիպեն նոյեմբերի 16-ին Մոսկվայում: Այս մասին լրագրողների հետ զրույցում հայտարարել է Ադրբեջանի արտաքին գործերի նախարար Էլմար Մամեդյարովը:

Բաքու-Թբիլիսի-Կարս երկաթգծի բացման արարողությանը մասնակցելու նպատակով Ադրբեջան մեկնած Թուրքիայի նախագահ Ռեջեփ Թայիփ Էրդողանը հերթական անգամ հայտարարություն է արել Լեռնային Ղարաբաղի հակամարտության վերաբերյալ: Սպառելով քաղաքական բառապաշարը՝ այս անգամ Էրդողանն անցել է անեծքների ժանրին. «Մենք անիծում ենք Հայաստանի օկուպացիոն քաղաքականությունը»: Նա նշել է, թե ԼՂ հիմնահարցը «արյունահոսող վերք է ոչ միայն Ադրբեջանի, այլև Թուրքիայի համար»՝ չմոռանալով  հերթական անգամ ասել, որ հիմնախնդրի կարգավորման հարցում աջակցում են Ադրբեջանին:

Հայոց ցեղասպանության դատապարտում

ՌԴ Դաշնային ժողովի եւ ՀՀ Ազգային ժողովի միջեւ համագործակցության հանձնաժողովի համանախագահ, Ռուսաստանի Դաշնության խորհրդի անդամ Նիկոլայ Ռիժկովն ու հանձնաժողովի անդամները Հայ-ռուսական միջխորհրդարանական համագործակցության հանձնաժողովի համանախագահ Արտաշես Գեղամյանի եւ ՀՀ ԱԺ նախկին պատգամավոր Վոլոդյա Բադալյանի ուղեկցությամբ այցելել են Ծիծեռնակաբերդի հուշահամալիր։

Պաշտոնական այցով Երևան այցելած Գերմանիայի երկրամասերի մշակույթի և լուսավորության նախարարների համաժողովի գլխավոր քարտուղար Ուդո Միխալիկը հանդիպել է ունեցել ՀՀ կրթության և գիտության նախարար Լևոն Մկրտչյանի հետ:  Ուդո Միխալիկը նշել է, որ ինքը նախարարների հանձնաժողովի առաջին ներկայացուցիչն է, ով այցելում է Հայաստան և մեր երկիր է ժամանել համագործակցության ամրանդման և զարգացման ծրագրերով: Նա ընդգծել է, որ Գերմանիայի Սաքսոն Անհալթի դպրոցների դասագրքերում ներառված է Հայոց ցեղասպանության մասին նյութը որպես կրթական ծրագրի բաղադրիչ:

Հայոց ցեղասպանության մասին պատմող՝ ռեժիսոր Ջո Բերլինգերի փաստագրական Intent to Destroy ֆիլմի պրեմիերան տեղի կունենա նոյեմբերի 10-ին՝ Լոս Անջելեսում և Նյու Յորքում: Այդ մասին տեղեկացրել է ֆիլմի երաժշտության հեղինակ, աշխարհահռչակ երաժիշտ Սերժ Թանկյանը:

Հայաստան և աշխարհ

Համաշխարհային բանկի «Գործարարություն 2018. բարեփոխումների իրականացում աշխատատեղերի ստեղծման համար» զեկույցում Հայաստանը գործարարությամբ զբաղվելու դյուրինության առումով զբաղեցնում է 47-րդ տեղը՝ նախորդ տարվա 38-րդ տեղի համեմատ:

Հնդկաստանի Հանրապետության վարչապետ Նարենդրա Մոդիի հրավերով աշխատանքային այցով Հնդկաստան ժամանած Նախագահ Սերժ Սարգսյանը Նյու Դելիում մասնակցել է «Համաշխարհային պարեն. Հնդկաստան-2017» համաժողովի լիագումար նիստին և նույն խորագրով միջազգային սննդարդյունաբերության ցուցահանդեսի բացման հանդիսավոր արարողությանը։ ՀՀ Նախագահ Սերժ Սարգսյանը հանդիպում է ունեցել վարչապետ Նարենդրա Մոդիի հետ: Նախագահ Սերժ Սարգսյանը Նյու Դելիում հանդիպել է ունեցել Հնդկաստանի Հանրապետության փոխնախագահ, խորհրդարանի վերին պալատի նախագահ Վենկայա Նայդուի հետ: Նախագահ Սերժ Սարգսյանը հանդիպել է Հնդկաստանի Հանրապետության նախագահ Ռամ Նաթ Քովինդի հետ: Շնորհակալություն հայտնելով հայկական պատվիրակությանը բարձր մակարդակով հյուրընկալելու համար՝ Նախագահ Սարգսյանը ևս մեկ անգամ շնորհավորել է Ռամ Նաթ Քովինդին Հնդկաստանի նախագահի պաշտոնում ընտրվելու կապակցությամբ և մաղթել նորանոր ձեռքբերումներ Հնդկաստանի բարգավաճմանն ու հնդիկ ժողովրդի բարեկեցությանն ուղղված նրա պատասխանատու գործում:

Նախագահ Սերժ Սարգսյանի Հնդկաստանի Հանրապետություն աշխատանքային այցի առաջին օրն ավարտվել է երեկոյան հայկական համայնքի ներկայացուցիչների հետ հանդիպմամբ: Հանրապետության Նախագահը ողջույնի խոսք է հղել հանդիպման մասնակիցներին, որում անդրադարձել է հայ-հնդկական պատմամշակութային առնչություններին, երկու ժողովուրդների դարավոր բարեկամության ամրապնդման գործում Հնդկաստանի հայ համայնքի մեծ դերին, Հայաստան-սփյուռք հարաբերություններին, հայրենիքի ու համայն հայության առջև ծառացած մարտահրավերներին և դրանց դիմակայելու հնարավոր ուղիներին, ինչպես նաև Հայաստանի կյանքում վերջին շրջանում տեղի ունեցած նշանակալի իրադարձություններին, այդ թվում` հանրաքվեի միջոցով կառավարման նոր` լիարժեք խորհրդարանական համակարգին անցնելուն: Հնդկաստան աշխատանքային այցի ավարտին Նախագահ Սերժ Սարգսյանը մեկնել է Ագրա քաղաք, որտեղ այցելել է Հնդկաստանի տեսարժան վայրերից մեկը՝ Թաջ Մահալ:

Ռուսաստանն օրերս Հայաստան կմատակարարի զենքի խմբաքանակ՝ գործող պայմանագրի շրջանակում: Իսկ 100 միլիոն դոլարի նոր, արդեն ստորագրված վարկային համաձայնագրի իրականացումը կսկսվի բոլոր միջպետական մակարդակներում հաստատվելուց հետո: Այդ մասին «ՌԻԱ Նովոստի»-ին տված հարցազրույցում ասել է ՀՀ Նախագահ Սերժ Սարգսյանը: Համաձայն նոր համաձայնագրի նախագծի, որը Հայաստանի կառավարությունը հավանության է արժանացրել 2017թ. հոկտեմբերի 12-ին, ՌԴ-ն հայկական կողմին կտրամադրի 100 միլիոն դոլարի պետական արտահանման վարկ՝ ռուսական արտադրության ռազմական նշանակության արտադրանքների մատակարարումները ֆինանսավորելու համար: Համաձայնագրի նախագծում նշվում է, որ վարկը տրամադրվում է 15 տարի մարման ժամկետով, տարեկան 3 տոկոս տոկոսադրույքով: Հայաստանը պետք է օգտվի վարկային միջոցներից 2018-2022 թվականներին:

ՀՀ Նախագահը նաև նշել է, որ Երևանն ու Մոսկվան մշակում են համատեղ ներդրումային ֆոնդի շրջանակում ծրագրերի իրականացման ճանապարհային քարտեզը. միջոցները կարող են ուղղվել նաև տեղեկատվական տեխնոլոգիաների ու էներգետիկայի ոլորտներում ծրագրերի ֆինանսավորմանը: Միաժամանակ, Սերժ Սարգսյանն ընդգծել է, որ զուգահեռ Հայաստանում ստեղծվել է ևս երկու ներդրումային ֆոնդ. դրանցից մեկը Համահայկական ներդրումային ֆոնդն է, երկրորդը՝ «Հայաստանի ներդրողների ակումբը»: «Նոյեմբերի 13-ին այս ֆոնդը Երևանում կազմակերպելու է մեծ շնորհանդես՝ ներդրումային ծրագիր սկսելու մասին (մեկ միլիարդ դոլարից մի փոքր ավելի): Դրանք ներդրումներ են հիմնականում Հայաստանի էներգետիկայի ոլորտում, ինչն իր մեջ ներառում է և Հայաստանի էլեկտրական ցանցերի արդիականացումը, նոր հիդրոէլեկտրակայանի կառուցումը և Schneider Electric հայտնի ընկերության էներգետիկների համար արտադրանքի կազմակերպումը: Եվ ես կարծում եմ, որ այդ արտադրանքը կգտնի իր սպառողին նաև ռուսական շուկայում»,- հավելել է Սերժ Սարգսյանը:     

Հայաստանը շարունակելու է գինեգործության և կոշիկի արտադրության ոլորտների զարգացման ուղղությամբ քայլերի իրականացումը: Այդ մասին «Россия 24» հեռուստաալիքին տված հարցազրույցում հայտարարել է ՀՀ Նախագահ Սերժ Սարգսյանը: Լրագրողը նշել է, որ մինչ այժմ մեր երկիրը հայտնի է եղել իր կոնյակով, սակայն գտնվելով Հայաստանում՝ բացահայտել են հայկական գինին և կատակելով ՀՀ Նախագահին հարցրել. «Ինչո՞ւ էիք այսքան ժամանակ թաքցնում այն մեզնից»:

ՀՀ Նախագահ Սերժ Սարգսյանը ընդունել է ՀՀ Ազգային ժողովի և ՌԴ Դաշնային ժողովի միջև համագործակցության միջխորհրդարանական հանձնաժողովի համանախագահ Նիկոլայ Ռիժկովի գլխավորած պատվիրակությանը, որը Հայաստանում է միջխորհրդարանական հանձնաժողովի 30-րդ նիստի անցկացման կապակցությամբ: ՀՀ Նախագահ Սերժ Սարգսյանն ընդունել է Հայաստանի Հանրապետությունում Բրազիլիայի Դաշնային Հանրապետության դեսպան Էդսոն Մարինյո Դուարտե Մոնտեյրոյին, ով ավարտում է դիվանագիտական առաքելությունը մեր երկրում: 

Նախագահ Սերժ Սարգսյանը ՄԱԿ-ին Հայաստանի անդամակցության և Հայաստանում ՄԱԿ-ի գործունեության 25-ամյա հոբելյանների կապակցությամբ այցելել է ՄԱԿ-ի հայաստանյան գրասենյակ: Նախագահը բարձր է գնահատել անցած 25 տարիներին Հայաստանում ՄԱԿ-ի կողմից երևանյան գրասենյակի միջոցով իրականացված զարգացման ծրագրերը, որոնք, նրա խոսքով, եղել են և՛ թիրախային, և՛ բազմազան՝ սկսած ժողովրդավարական հաստատություններին աջակցությունից մինչև փոքր և միջին բիզնեսին օժանդակություն: ՀՀ Նախագահ Սերժ Սարգսյանն Եվրոպական կրթական տարածաշրջանային ակադեմիայի հիմնադրման 15-ամյակի կապակցությամբ այցելել է կրթական այդ հաստատություն:

Ուզբեկստանի Հանրապետություն կատարած այցի շրջանակում վարչապետ Կարեն Կարապետյանը Տաշքենդում մասնակցել է  ԱՊՀ կառավարությունների ղեկավարների խորհրդի  նախ նեղ, ապա՝ ընդլայնված կազմով նիստերին: Նեղ կազմով հանդիպմանը ՀՀ վարչապետն անդրադարձել է Ազատ առևտրի գոտու մասին պայմանագրին՝  նշելով, որ պայմանագիրը համարվում է այն հիմքը, որը լայն հնարավորություններ է ստեղծում՝  ԱՊՀ-ում փոխշահավետ առևտրատնտեսական համագործակցության առաջխաղացման համար: Կարեն Կարապետյանը հանդիպել է Ուզբեկստանի Հանրապետության կառավարության ղեկավար Աբդուլլա Արիպովին: Հանդիպմանը վարչապետը նշել է, որ Հայաստանը հետաքրքրված է Ուզբեկստանի հետ միջպետական կապերի ակտիվացմամբ: ՀՀ վարչապետ Կարեն Կարապետյանը հանդիպել է երկրի նախագահ Շավքաթ Միրզիյոևի հետ։ Ինչպես «Արմենպրես»-ին տեղեկացրին  ՀՀ կառավարության տեղեկատվության և հասարակայնության հետ կապերի վարչությունից, շնորհակալություն հայտնելով ջերմ ընդունելության համար՝ Կարեն Կարապետյանն ընդգծել է երկու պետությունների միջև առկա ներուժի ու փոխգործակցության հնարավորությունների լիարժեք օգտագործման անհրաժեշտությունը:

ՀՀ ԱԳ նախարար Էդվարդ Նալբանդյանը ելույթ է ունեցել ՅՈՒՆԵՍԿՕ-ի Գլխավոր կոնֆերանսի 39-րդ նստաշրջանում։ «Կրթությունը զորեղ գործիք է այս կազմակերպության կողմից որդեգրած արժեքները խթանելու համար: Ցավալի է, որ որոշ պետություններ կրթությունն օգտագործում են հակադիր նպատակներով՝ դրա միջոցով ազգայնական ատելություն սերմանելով, հատկապես երիտասարդների շրջանում: Ադրբեջանի դասագրքերում բազմաթիվ նման օրինակներ կան. դրանցից մեկը երեխաներին սովորեցնում է, որ հայերն իրենց գենետիկ թշնամիներն են: Ռասիզմի և անհանդուրժողականության դեմ պայքարի եվրոպական հանձնաժողովի 2016թ. զեկույցում նշված է, որ «Ադրբեջանի քաղաքական առաջնորդները, կրթական հաստատությունները և լրատվամիջոցները շարունակել են հայերի նկատմամբ ատելությամբ լի կոչեր հնչեցնել. ադրբեջանցիների մի ամբողջ սերունդ է մեծացել` անսալով ատելության այս հռետորաբանությանը»: ՅՈՒՆԵՍԿՕ-ի Կանոնադրության մեջ արդարացիորեն ամրագրված է, որ «պատերազմները սկսվում են մարդկանց ուղեղներում»: Հասարակությունները պատրաստ չեն լինի հաշտեցմանը, եթե նրանց գիտակցության մեջ չամրագրվի խաղաղության պաշտպանության անհրաժեշտությունը»,- նշել է ՀՀ ԱԳ նախարարը:

ՀՀ ԱԺ պատվիրակությունն արտաքին հարաբերությունների մշտական հանձնաժողովի նախագահ Արմեն Աշոտյանի գլխավորությամբ հոկտեմբերի 29-ից նոյեմբերի 1-ը Կիեւում մասնակցել է Եվրանեսթ խորհրդարանական վեհաժողովի լիագումար նիստի աշխատանքներին: Արմեն Աշոտյանը Կիեւից հայտնել է, որ վեհաժողովի աշխատանքների համար խորհրդարանական պատվիրակության կողմից պատրաստվել եւ շրջանառվել է «Մահացու ինքնավար զենքի» կիրառումը կանոնակարգող բանաձեւի հրատապ նախագիծ, որն ընդունվել է Եվրանեսթ ԽՎ-ի լիագումար նիստում: 

Շատ ուրախ եմ, որ գտնվում եմ Արցախի Հանրապետությունում և հնարավորություն ունեմ անձամբ ծանոթանալու այստեղ ապրող մարդկանց և նրանց խնդիրներին: Այս մասին «Արցախպրես»-ի թղթակցի հետ զրույցում ասել է Գերմանիայի Բադեն-Վյուրթեմբերգ երկրամասի պատգամավոր, «Այլընտրանք Գերմանիայի համար» կուսակցության խորհրդարանական խմբակցության անդամ Լարս Պատրիկ Բերգն, ով նախօրեին Ստեփանակերտ է ժամանել Գերմանիայում Արցախի Հանրապետության մշտական ներկայացուցիչ  Հարություն Գրիգորյանի ուղեկցությամբ: «Երկօրյա այցի ընթացքում կարևոր հանդիպումներ եմ ունեցել ինչպես քաղաքական իշխանության, այնպես էլ հասարակության ներկայացուցիչների հետ: Շատ հետաքրքիր ու օգտակար տեղեկատվություն եմ հավաքել: Կարծում եմ՝ Արցախի հետ համագործակցությունը ոչ միայն անհրաժեշտ է, այլև չպետք է սահմանափակվի տարբեր քաղաքական գործիչների միայն մասնավոր այցերով: Այդ մասին ես անպայման կբարձրաձայնեմ  իմ գործընկերների հետ հանդիպումներում»,- ասել է գերմանացի խորհրդարանականը և հավելել, որ այցի ընթացքում համոզվել է, որ Արցախի մասին շատ քիչ և թյուր տեղեկություն կա Գերմանիայում:

ՀՀ կառավարությունը հավանություն տվեց «Հայաստանի Հանրապետության և Ասիական զարգացման բանկի միջև «Հանրային արդյունավետության և ֆինանսական շուկաների ծրագիր. ենթածրագիր 1» վարկային համաձայնագրի նախագծին: Համաձայնագրով նախատեսվում է ՀՀ-ին տրամադրել 40 մլն ԱՄՆ դոլարի բյուջետային աջակցության վարկ:

Հայաստանում անցկացվել է Եվրասիական ֆոնդային բորսաների միության 24-րդ տարեկան վեհաժողովը: Եռօրյա միջոցառումը համախմբել է միության անդամ բորսաների ղեկավարներին, ավելի քան 20 երկրների ներկայացուցիչներին: Միության գլխավոր քարտուղար Կոնստանտին Սարոյանը տեղեկացրեց, որ սա առաջին հանդիպումն է միության գլխավոր գրասենյակը Ստամբուլից Երեւան տեղափոխելուց հետո: Վեհաժողովի շրջանակում քննարկվելու  են  ֆեդերացիայի զարգացման հիմնական ռազմավարությունները, մասնակիցները հնարավորություն են ունենալու փոխանակելու եւ ներկայացնելու անդամ երկրների ֆինանսական շուկաների գործունեությունը:

Հնդկական Sommelier գինու ամսագիրն անդրադարձել է Հայաստանում գինեգործության՝ դարերի խորքից եկող ավանդույթներին և ներկա միտումներին:

Ներհայաստանյան զարգացումներ

Հայաստանի Հանրապետության Նախագահ Սերժ Սարգսյանն ստորագրել է հրամանագիր 2017 թվականի ձմեռային զորակոչ անցկացնելու և զորացրում կատարելու մասին:

Ազգային ժողովի փոխնախագահ Էդուարդ Շարմազանովը վստահեցնում է, որ ՀՀ վարչապետ Կարեն Կարապետյանը իշխող Հանրապետական կուսակցության քաղաքական թիմի առանցքային ներկայացուցիչներից է և անհեթեթ է որակում գնահատականները, թե ՀՀԿ ներկայացուցիչները հոկտեմբերի 30-ին մեկնարկած 2018թ. պետական բյուջեի նախագծի քննարկումներին բոյկոտել են վարչապետին: 

ՀՀ վարչապետ Կարեն Կարապետյանն ասուլիս է հրավիրել՝ ամփոփելու մեկամյա գործունեության արդյունքները: Նա ներկայացրել է ընթացիկ տարվա հիմնական մակրոտնտեսական ցուցանիշների աճը և 2018 թվականին նախատեսված բյուջեի եկամուտները, դեֆիցիտը և ծախսերը: 

Ազգային ժողովի մշտական հանձնաժողովների համատեղ նիստում ՀՀ 2018թ. պետական բյուջեի նախագծի քննարկման ժամանակ ՀՀ վարչապետ Կարեն Կարապետյանն ընդգծեց, որ Հայաստանի 2018թ. պետական բյուջեի նախագծով կառավարությունը պլանավորել է այնպիսի հարկաբյուջետային քաղաքականություն, որը կկանխորոշի հետագա տարիների կայուն տնտեսական աճը: «Այժմ, թեև նկատվող դրական միտումներին, տնտեսական աճի հիմքերը դեռևս բավարար ամուր չեն տնտեսական կայուն աճի ապահովման համար: Դրա համար մենք 2018թ. բյուջեով ծրագրել ենք այնպիսի հարկաբյուջետային քաղաքականություն, որը կկանխորոշի հետագա տարիների կայուն տնտեսական աճը՝ ապահովելով 5 տոկոսանոց կայուն տնտեսական աճ, ինչը հնարավորություն կտա առավել արդյունավետ լուծել մեր առջև ծառացած խնդիրները: Նշված ցուցանիշին հասնելը մեզանից մեծ ջանքեր է պահանջելու»,- ընդգծեց վարչապետը:

Հայաստանում մեկ շնչին բաժին ընկնող ՀՆԱ-ն 2018 թ. աճելու է, ինչը նշանակում է, որ բնակչության ընդհանուր կենսամակարդակը մեկ շնչին բաժին ընկնող ՀՆԱ-ի առումով բարձրանալու է: Ազգային ժողովի մշտական հանձնաժողովների համատեղ նիստում ՀՀ 2018 թ. պետական բյուջեի նախագծի քննարկմանն այս մասին ասաց ՀՀ ֆինանսների նախարար Վարդան Արամյանը։ Նա հավելեց, որ բնակչության կյանքի որակի մասին պատկերացում կազմելու լավագույն ձևերից մեկը սպառման ցուցանիշներին հետևելն է: «2017 թ. մասնավոր սպառումն աճում է, աճում են սպառողական վարկերը: Սա խոսում է մի բանի մասին. թեկուզ մենք ազգաբնակչության եկամուտների մասով համեստ աճ ունենք, բայց  մարդիկ իրենց ապագայի նկատմամբ դրական սպասումներ ունեն»,- մանրամասնեց Վարդան Արամյանը:

Հարկային օրենսգրքով կատարված փոփոխությունների արդյունքում կառավարությունը նախատեսում է 10 միլիարդ 280 դրամի լրացուցիչ եկամուտ ստանալ 2018 թվականին: Այս մասին Ազգային ժողովում ՀՀ 2018թ. պետական բյուջեի նախագծի քննարկման ժամանակ հայտնեց ՀՀ ֆինանսների նախարարի առաջին տեղակալ Ատոմ Ջանջուղազյանը: «Սա հիմնականում պայմանավորված է ծխախոտիբենզինիսեղմած գազի և ալկոհոլային խմիչքների նկատմամբ ակցիզային հարկի դրույքաչափերի բարձրացմամբ»,- նշեց Ջանջուղազյանը:

Երևանի ավագանին քվեարկությամբ հաստատել է Երևանի զարգացման 2018-2022 թվականների հնգամյա ծրագիրը:

Դանակով զինված անձը հոկտեմբերի 30-ին հարձակվել է Արմավիր քաղաքի «Մանուշակ» մանկապարտեզի աշխատակիցների վրա: Իրավապահ մարմինների գործողությունների արդյունքում Արմավիր քաղաքի «Մանուշակ» մանկապարտեզում պատանդ վերցված երեխան ազատ արձակվեց:

ՀՀ արտակարգ իրավիճակների նախարարությունում աշխատանքային խորհրդակցության նախարար Դավիթ Տոնոյանը հայտնել է, որ 112 ահազանգման համարը, որը Եվրոպական միության բոլոր երկրներում, Ռուսաստանի Դաշնությունում և ասիական գրեթե բոլոր երկրներում կիրառում և ճանաչում են որպես միացյալ ահազանգման հեռախոսահամար, այսուհետ պետք է լայնորեն ճանաչվի և «911»-ին զուգահեռ գործարկվի նաև Հայաստանում:

Սփյուռք

Russia Today լրատվական հեռուստաալիքի տնօրեն Մարգարիտա Սիմոնյանը «Ֆորբս» ամսագրի ամենաազդեցիկ կանանց ցուցակում առաջ է անցել ԱՄՆ նախկին պետքարտուղար Հիլարի Քլինթոնից:

Միջազգային խճանկար

ԱՄՆ Նյու Յորք քաղաքում տղամարդը փոքր բեռնատար մեքենայով մեծ արագությամբ քշել է Մանհեթնի անցորդների և հեծանվորդների վրա: Մեքենան մի քանի թաղամաս սլացել է հեծանվորդների համար նախատեսված ճանապարհով և կանգ է առել միայն դպրոցական ավտոբուսին բախվելուց հետո: Կատարվածի հետևանքով զոհվել է 8 մարդ, վնասվածքներ են ստացել ավելի քան 12-ը: Տեղական իշխանությունները կատարվածն արդեն ահաբեկչություն են որակել: Երբ տղամարդը զենքը ձեռքին դուրս է եկել մեքենայից, ոստիկանները նրա դեմ կրակ են բացել՝ վիրավորելով ահաբեկչին: Վերջինս տեղափոխվել է հիվանդանոց: Ամերիկյան CNN հեռուստաընկերության տվյալներով՝ հանցագործը, դուրս գալով մեքենայից բղավել է «Ալլահ աքբար»: Ավելի ուշ հայտնի է դարձել, որ նրա մոտ եղել է գրություն, որում նշված է եղել, թե ինքը գործել է «Իսլամական պետություն» ահաբեկչական խմբավորման անունից: Բելգիայի և Արգենտինայի արտգործնախարարություններից հայտնել են, որ զոհերի թվում կան իրենց երկրների քաղաքացիներ: Ամերիկյան լրատվամիջոցներն հայտնել են, որ ահաբեկչության հեղինակը 29-ամյա ուզբեկ Սայֆուլլո Խաբիբուլաևիչ Սաիպովն է: Նա ԱՄՆ է տեղափոխվել 2010 թվականին: ՀՀ Նախագահ Սերժ Սարգսյանը ցավակցական հեռագիր է հղել ԱՄՆ նախագահ Դոնալդ Թրամփին Նյու Յորքում տեղի ունեցած ահաբեկչական հարձակման կապակցությամբ, որը տասնյակ անմեղ զոհերի և վիրավորների պատճառ է դարձել: 

Ֆրանսիայի իշխանությունները քաղաքական համաձայնության են եկել 2018 թվականին Նոր Կալեդոնիայի ինքնորոշման հանրաքվեի շուրջը:

Իսպանացիների շուրջ 40 տոկոսը կարծում Է, որ Սահմանադրության 155-րդ հոդվածը, որը թույլ Է տալիս սահմանափակել ինքնավար մարզի ինքնակառավարումը, պետք Է ավելի վաղ կիրառվեր Կատալոնիայի իրադրության կարգավորման համար: Հարցման մասնակիցների 20,9 տոկոսն այն կարծիքն Է հայտնել, որ Իսպանիայի կառավարությունը համապատասխան քայլեր Է ձեռնարկել հարմար պահին: Հարցվածների եւս շուրջ 27 տոկոսը կարծում Է, որ 155-րդ հոդվածը բնավ չպետք Է հավանության արժանանար: Կատալոնիայի խորհրդարանը, որն արձակվել Է Իսպանիայի կառավարության կողմից, ընդունել Է այդ որոշումը եւ դադարեցրել աշխատանքը մինչեւ վաղաժամկետ ընտրությունների անցկացումը: Կատալոնիայի կառավարության մոտավորապես կեսը չի ճանաչում պաշտոններից իրենց հեռացնելու վերաբերյալ Մադրիդի որոշումը եւ մնում են տարածաշրջանի «միակ օրինական ղեկավարները»: Կատալոնիայի կառավարությունը փորձեց օգտագործել Մադրիդի հետ երկխոսության կարգավորման բոլոր հնարավորությունները, սակայն, գիտակցելով դրա անհնարինությունը, հարկադրված Էր անկախություն հռչակել: Այդ մասին Իսպանիայի կողմից ինքնավարության ղեկավարի պաշտոնից հեռացված Կառլես Պուչդեմոնը հայտարարել Է Բրյուսելում կայացած մամուլի ասուլիսում։ Նրա խոսքով՝ Կատալոնիան «դեպի անկախություն խաղաղ շարժման գործողությունների ծրագիր Է ընդունել՝ խուսափելով բռնությունից»: Իսպանիայի Գերագույն դատարանը կարգադրել Է մինչեւ նոյեմբերի 9-ը ոստիկանական հսկողության տակ վերցնել Կատալոնիայի խորհրդարանի այն անդամներին, որոնք անկախության հասնելու կատալոնյան իշխանությունների փորձի մասին գործի ֆիգուրանտներ են դարձել:

Մշակույթ

ԳԴՀ Բադեն-Վյուրթեմբերգ երկրամասի մայրաքաղաք Շտուտգարտում անցկացվել են արդեն ավանդական դարձած հայկական մշակութային օրերը, որոնց նպատակն է Գերմանիայի հասարակությանը ներկայացնել հայ ժողովրդի հարուստ պատմական ժառանգությունը, մշակույթն ու ավանդույթները: Այս տարվա միջոցառումները անցկացվում են «Մաշտոցը հանդիպեց Լյութերին․ մշակույթների հանդիպում» խորագրի ներքո:

«Կիեւյան պատկերասրահ» ազգային թանգարանը երկարացրել Է Հովհաննես Այվազովսկու ծննդյան 200-ամյակին նվիրված «Հանճարը եւ ծովը: Ավանդույթներ, որոնումներ, հայտնագործություններ» ցուցահանդեսի աշխատանքը մինչեւ նոյեմբերի 19-ը։ Ինչպես նշել Է թանգարանի տնօրեն Յուրի Վակուլենկոն, այդ որոշումն ընդունվել Է այն բանի կապակցությամբ, որ ցուցահանդեսը մեծ պահանջարկ Է վայելում: Ավելի վաղ հաղորդվել Էր, որ սեպտեմբերին մեկնարկած ցուցահանդեսը կշարունակվի մինչեւ հոկտեմբերի 31-ը։

Երկարատև ծանր հիվանդությունից հետո կյանքի 81–րդ տարում մահացել է Կ. Ստանիսլավսկու անվան ռուսական պետական դրամատիկական թատրոնի գեղարվեստական ղեկավար և գլխավոր ռեժիսոր, բեմադրիչ Ալեքսանդր Գրիգորյանը։ ՀՀ Նախագահ Սերժ Սարգսյանը ցավակցական հեռագիր է հղել Գրիգորյանների ընտանիքին Հայաստանի Հանրապետության ժողովրդական արտիստ, Երևանի Կ. Ստանիսլավսկու անվան ռուսական պետական դրամատիկական թատրոնի գեղարվեստական ղեկավար և գլխավոր ռեժիսոր Ալեքսանդր Գրիգորյանի մահվան կապակցությամբ

Կոմպոզիտորների միության վերընտրված նախագահ Արամ Սաթյանը նպատակ ունի նորոգել Դիլիջանի Էդվարդ Միրզոյանի անվան կոմպոզիտորների ստեղծագործական տան Բեթհովենի անվան դահլիճը՝ անվանի կոմպոզիտորի 250-ամյակին մեծ համերգային ծրագիր իրականացնելու ակնկալիքով: «Արմենպրես»-ի թղթակցի հետ զրույցում Արամ Սաթյանը խոսել է իր նախագահության ընթացքում միության գրանցած հաջողությունների և հետագա ծրագրերի մասին:

Սպորտ

Լիբանանի հայկական «Հոմենթմեն» բասկետբոլի թիմը դարձել է արաբական լիգայի հաղթող՝ եզրափակչում հաղթելով Մարոկկոյի «Սալա»-ին: Հանդիպման լավագույն բասկետբոլիստ ճանաչվեց Հայկ Գյոկչյանը:

Կայացել է Chess.com խոշորագույն շախմատային կայքի կազմակերպված PRO Chess League մրցաշարի որակավորման փուլը, որտեղ մրցում էին երկու խմբի բաժանված 38 թիմեր. առաջին խմբում հանդես էր գալիս Եվրոպան, Աֆրիկան և Հարավային Ասիան ներկայացնող 22 թիմ, և «Հայկական արծիվներ» թիմը, որի կազմում հանդես էին գրոսմայստերներ Զավեն Անդրիասյանը, Սամվել Տեր-Սահակյանը, Մանուէլ Պետրոսյանը և ազգային վարպետ Արտակ Մանուկյանը, վաստակեց 37.5 թիմային միավոր, գրավեց առաջին հորիզոնականը և դուրս եկավ եզրափակիչ:

Հայկական շախմատի առաջատար Լևոն Արոնյանը երկրորդն է ՖԻԴԵ-ի նոր դասակարգման աղյուսակում:

 





https://zen.yandex.ru/id/5dee07a31e8e3f00ae3051c1

https://www.gov.am/files/docs/3969.pdf
youtube

Բոլոր նորությունները    


New Xar

Գործակալության մասին

Հասցե՝ Հայաստան, 0002, Երեւան, Սարյան փող 22, Արմենպրես
Հեռ.՝ +374 11 539818
Էլ-փոստ՝ [email protected]
settings Էջի կարգավորումներ