ԵՐԵՎԱՆ, 31 ՀՈԿՏԵՄԲԵՐԻ, ԱՐՄԵՆՊՐԵՍ: Ռուսաստանի երիտասարդական հավաքականի գլխավոր մարզիչ Եվգենի Բուշմանովը անդրադարձել է Եվրո-2019-ի ընտրական փուլում Հայաստանի մինչև 21 տարեկանների հավաքականի հետ խաղի սպասելիքներից: «Հայաստանի հետ արտագնա խաղում մեզ հաղթանակ է պետք, համապատասխան տրամադրվածությամբ էլ պատրաստվելու ենք այդ խաղին: Հայաստանի հավաքականի հետ տնային խաղին մեզ չհաջողվեց գոլ խփել՝ չնայած զգալի առավելությանը: Բայց յուրաքանչյուր խաղն առանձին, նոր պատմություն է: Պետք է մեր ուժը ցույց տանք Երևանում, պահեր ստեղծենք ու իրացնենք մեր գոլային պահերը, այդ դեպքում ամեն ինչ լավ կլինի», - «Արմենպրես»-ի փոխանցմամբ, Բուշմանովի խոսքն է մեջբերել Ռուսաստանի ֆուտբոլային միության պաշտոնական կայքը:

Հայաստան Մ-21 - Ռուսաստան Մ-21 հանդիպումը կկայանա նոյեմբերի 10-ին՝ Երևանի ֆուտբոլի ակադեմիայի մարզադաշտում՝ 16:00-ին:

Այս թիմերի առաջին հանդիպումը, որը կայացել է սեպտեմբերին՝ Մոսկվայում, ավարտվել էր ոչ ոքի՝  0:0 հաշվով: