ՀՀ Նախագահը մրցանակներ հանձնեց հայերեն ժեստերի լեզվով հավելվածի հեղինակներին
ԵՐԵՎԱՆ, 26 ՀՈԿՏԵՄԲԵՐԻ, ԱՐՄԵՆՊՐԵՍ: ՀՀ Նախագահ Սերժ Սարգսյանը պլանշետներ նվիրեց Արագածոտնի մարզի Կարբի գյուղի Վահան Թեքեյանի անվան միջնակարգ դպրոցի հինգ աշակերտուհիների, ովքեր հաղթել են «Թեքնովեյշն» մրցույթում: «Արմենպրես»-ի հաղորդմամբ` աղջիկների թիմը մրցույթի «կրթություն» անվանակարգում ստեղծել է «Հայերեն ժեստերի լեզու» հավելվածը: Մրցանակակիրներից Վարդանուշ Նազարեթյանն ասաց, որ գաղափարն իրենց մոտ հանկարածակի է ծնվել: «Մենք այդ մտքին եկանք այն ժամանակ, երբ մեր դպրոց եկավ մեր ընկերներից մեկի բարեկամը: Մենք նրա հետ շփվելու արդյունքում հասկացանք, որ լսողական խանգարումներ ունի եւ մեզ համար նպատակ դարձավ ստեղծել ժեստերի լեզվով հայերեն հավելվածը»,-ասաց նա:
Աղջիկների թիմը 10 հազար դոլար մրցանակ էր ստացել, որն օգտագործելու է զարգացնելու համար այդ հավելվածը: Այն հետագայում կներդրվի Google եւ iOS համակարգերում:
«Թեքնովեյշն» մրցույթը աշխարհի խոշորագույն տեխնոլոգիական ձեռներեցության մրցույթ է`10-18 տարեկան աղջիկների համար: Այս տարի մրցույթին մասնակցել են 105 երկրների 3000-ից ավելի թիմեր: Մրցույթի եզրափակիչ փուլը կայացել է Միացյալ Նահանգների Սիլիկոնային հովտում` Google-ի գլխամասային գրասենյակում:
Բաժանորդագրվեք մեր ալիքին Telegram-ում