ԵՐԵՎԱՆ, 24 ՀՈԿՏԵՄԲԵՐԻ, ԱՐՄԵՆՊՐԵՍ: Ազգային ժողովի «Ելք» խմբակցության պատգամավոր Մանե Թանդիլյանը խորհրդարանի ամբիոնից ներկայացրեց «Ելք» դաշինքի հայտարարությունը Հայաստան-Եվրոպական-Միություն համապարփակ և ընդլայնված գործընկերության համաձայնագրի ստորագրման վերաբերյալ: Ինչպես հաղորդում է «Արմենպրես»-ը, պատգամավորը հայտարարությունը ներկայացրեց Ազգային ժողովի հայտարարությունների ժամին:

«Հիմք ընդունելով օրերս Եվրոպական Միության կողմից հրապարակված Հայաստան-Եվրոպական Միություն համապարփակ և ընդլայնված գործընկերության սույն թվականի նոյեմբերին ստորագրվելիք պայմանագրի տեքստը, հաշվի առնելով, որ պայմանագիրը ներառում է քաղաքական, տնտեսական, իրավական և հասարակական բոլոր ոլորտներում բարեփոխումների ճանապարհային քարտեզ, գիտակցելով, որ ԵՄ-ի հետ համապարփակ համագործակցության հաստատումը և դրա հետագա խորացումը կարող է զգալիորեն նպաստել Հայաստանի քաղաքական, տնտեսական, իրավական ոլորտներում մի շարք արատավոր երևույթների հաղթահարմանը՝ «Ելք» դաշինքն արձանագրում է.

«Հայաստանի Հանրապետության և Եվրոպական Միության միջև բանակցված Համապարփակ և ընդլայնված գործընկերության պայմանագիրը կարևորագույն խթան է Հայաստան-Եվրոպական Միություն Հայաստանում սոցիալ-տնտեսական և քաղաքական լրջագույն բարեփոխումների համար: «Ելք» դաշինքը աջակցություն է հայտնում Հայաստան-ԵՄ շրջանակային համաձայնագրի ստորագրման գործընթացին՝ այն համարելով երկկողմ ու բազմակողմ հարաբերութունների խորացման գրավական և պատրաստակամություն հայտնելով խորհրդարանական վավերացման փուլում կողմ քվեարկել համաձայնագրին:

«Ելք» դաշինքը կոչ է անում ստորագրող կողմերին մինչև վերջ ցուցաբերել քաղաքական կամք և հետևողականություն ավարտին հասցնելու համաձայնագրի ստորագրման և հետագա վավերացման գործընթացը: