Մեկնարկել է «Խելացի քաղաք» երկօրյա հաքատոնը
ԵՐԵՎԱՆ, 21 ՀՈԿՏԵՄԲԵՐԻ, ԱՐՄԵՆՊՐԵՍ: Երեւանի քաղաքապետարանում մեկնարկել է «Խելացի քաղաք» երկօրյա հաքատոնը: «Արմենպրես»-ի հաղորդմամբ՝ լրագրողների հետ զրույցում Երեւանի քաղաքապետ Տարոն Մարգարյանն ասաց, որ երիտասարդները հաքաթոնի ընթացքում կներկայացնեն տվյալներ, որոնք վերաբերում են քաղաքի կառավարման տարբեր ոլորտներին՝ շենքերի կառավարում, զբոսաշրջության զարգացում և քաղաքի մաքրություն: «Վաղն արդեն պարզ կլինի, թե ինչ առաջարկներ են ներկայացվել, որոնք հետագայում կընդգրկվեն «Խելացի քաղաք»-ի ծրագրերում: Մենք բաց եւ թափանցիկ ենք լինելու եւ յուրաքանչյուր ամիս ներկայացնելու ենք կատարվող աշխատանքները»,-ասաց քաղաքապետը՝ հավելելով, որ լինելու է նաեւ համագործակցություն միջազգային կառույցների եւ այն փորձառու քաղաքների հետ, որտեղ «Խելացի քաղաք»-ն արդեն իրականություն է:
«Խելացի քաղաք» հաքաթոնը Երևանի քաղաքապետարանի, Եվրոպական Միության և ՄԱԿ-ի Զարգացման ծրագրի համատեղ նախաձեռնությունն է, որի նպատակն է մշակել խելացի լուծումներ՝ Երևան քաղաքի համար:
Հաքաթոնի ընթացքում շուրջ 60 մասնագետներ աշխատում են տրամադրված տվյալների շտեմարաններով՝ Երևանի համար մշակելով խելացի լուծումներ երեք հիմնական ուղղություններով.տվյալների վերլուծություն, տվյալների վիզուալիզացում և նոր տվյալների հավաքագրման մեխանիզմների մշակում:
Հաքաթոնի ամփոփիչ փուլում (հոկտեմբերի 22-ին) յուրաքանչյուր թիմի կտրվի 5 րոպե ժամանակ՝ մշակված լուծման պրոտոտիպը ներկայացնելու համար: Ժյուրիի կողմից ընտրված գաղափարները կանցնեն Կոլբալաբի ինկուբացիայի փուլ և կստանան ծրագրի իրականացման նախնական ներդրում՝ հետևյալ համամասնությամբ.
1. Լավագույն գաղափարը՝ մինչև 5000 ԱՄՆ դոլարին համարժեք դրամ՝ ծրագրի իրականացման համար:
2. Երկրորդ գաղափարը՝ մինչև 4000 ԱՄՆ դոլարին համարժեք դրամ՝ ծրագրի իրականացման համար:
3. Երրորդ գաղափարը՝ մինչև 3000 ԱՄՆ դոլարին համարժեք դրամ՝ ծրագրի իրականացման համար:
«Խելացի քաղաք» հաքաթոնը կազմակերպվում է «Նորարար առաջընթաց» (#Inno4Dev) ծրագրի շրջանակներում, որը ֆինանսավորվում է Եվրոպական Միության կողմից:
Բաժանորդագրվեք մեր ալիքին Telegram-ում